nepal life 2076 3 18

Error message

Deprecated function: The each() function is deprecated. This message will be suppressed on further calls in _menu_load_objects() (line 579 of /home/newahub/public_html/includes/menu.inc).

प्रोजेक्ट बाजा नेपालया ‘सिलु उत्सव’ न्ह्याइपुक्क क्वचाल

नेवा: अनलाइन न्युज – ललेन्द्र शाक्य | २०७६ श्रावण २६, आइतबार १७:२६:२४

गुंला महिनाया लकसय् प्रोजेक्ट बाजा नेपालं ‘सिलु फेस्टिभल इन दरवार’ सांगीतिक ज्याझ्वः शनिवाः बहनी न्ह्याइपुक्क क्वचायेकूगु दु ।

दिवंगतपिंप्रति समर्पित गुंला पर्वया इलय् थ्वइगु थीथी परम्परागत संगीत न्ह्यब्वयेगु तातुनां ग्वसाः ग्वःगु उगु ज्याझ्वः बौद्धलिला नाच न्ह्यब्वसें न्ह्याःगु खः ।

यल लाय्कूया नासः चुकय् जूगु ज्याझ्वलय् न्ह्यब्वःगु बौद्ध लिला प्याखं ३८० दँनिसें न्ह्यानाः वयाच्वंगु कार्तिक नाचया इलय् हुइकीगु प्याखं खः । लच्छितक क्यनीगु कात्तिप्याखं दिनावंगु इतिहास नं दुसा थौंकन्हे १२ न्हुतक क्यनाः वयाच्वंगु दु ।

तिथि कथं प्याखं न्ह्यब्वये बलय् चतुर्दसि बाय् पुन्ही निन्हु क्यन धाःसा जक क्यनीगु थुगु प्याखं दुर्लभ प्याखं खः ।

कार्तिक नाच संरक्षण समितिया न्ह्यब्वया थुगु प्याखया नितिं प्रतापधर शर्मा व सुरेन्द्र बज्राचार्यं खिं थानादिलसा उत्तमरत्न शाक्य, सुप्रिन शाक्य, पूजन श्रेष्ठ, रिजन महर्जन, कोशिस ताम्रकारं प्याखं न्ह्यब्वयादिल ।

लुभु महालक्ष्मी धाः दाफा खलःया विपु श्रेष्ठ, युजेश श्रेष्ठ, सुनिल श्रेष्ठ, प्रशन्न श्रेष्ठ, अभिषेक श्रेष्ठ, सनिष श्रेष्ठ व रोजेश श्रेष्ठं थुगु प्याखं न्ह्यब्वयेत म्ये हालादीगु खः ।

सांगीतिक परम्पराया अध्ययन यासें त्वाःत्वालय् न्ह्यानाच्वगु सांगीतिक परम्परायात दबुलिइ न्ह्यब्वयेगु तातुनाकथं ग्वसाः खलः प्रोजेक्ट बाजा नेपालं थुगुसी च्वबु गाःहिति हरिभजन दाफा खलःयात न्ह्यब्वःगु खः । 

१४ दँ निसें ९५ दँ तकया म्येहालामि, वाद्यवादक दुथ्याःगु थुगु पुचलं ललित, नेपाल समुद्र व सवमाई दाफा भजन न्ह्यब्वःगु खः । दिनेश महर्जनया नेतृत्वय् आःजु कान्छा महर्जन, म्ये गुरु सानुकाजी महर्जन, खिं गुरु बेखालाल महर्जन, नामसंगीति गुरु बाबुकाजी महर्जननाप सहायक गुरु दशरथलाल महर्जन, गौतम महर्जन, नारायण महर्जन, बाबुराजा महर्जन, त्रिरत्न महर्जन, सानु महर्जन, रत्न महर्जन, विजय महर्जन, मधुर महर्जन, चन्द्रलाल महर्जनं म्ये हालादिलसा अबिज महर्जन, एन्जेल महर्जन, आभाष महर्जनं खिं थानादीगु खः ।

प्रोजेक्ट बाजा नेपालं गुरु सुरेशराज बज्राचार्यया वाद्य संयोजनय् भगवान द्यःथाय् हालीगु अतिकं प्रचलित भगवान द्यःया वर्णन दुगु भगवान ग्वारा न्ह्यब्वल ।

पञ्चमाः तालय् हालीगु भगवान ग्वारा राग सारंगय् आधारित खः । थुगु राग न्ह्यब्वयेगु नितिं सरोदवादन सुरेशराज बज्राचार्य, फिरोज बज्राचार्य, भ्वाइलिन मिलन तण्डुकार, तालवादन लक्ष्मीप्रसाद डंगोल, विपु श्रेष्ठ, ताः, भुस्याः, छुस्याः, इफेक्ट सजिष श्रेष्ठ, रोजेश श्रेष्ठ, बास गिटार भूपेन्द्र बज्राचार्य, गितार सुमन महर्जन व बाँसुरी स्वर्णीम महर्जनं पुयादीगु खःसा थुगु प्रस्तुति लिपा “जय नमोश्री बुद्ध भगवान” न्ह्यब्वःगु खः ।

थ्वहे झ्वलय् प्रोजेक्ट बाजा नेपालं नेवाः सांगीतिक परम्पराया अतिकं लोकंह्वाःगु ऋतुम्ये सिलु धून न्ह्यब्वःगु खःसा गुंलाय् यलय् न्यायेकीगु श्रृंगभेरी न्यकू जात्रा मतयाःया इलय् हालीगु परम्परागत म्ये न्ह्यब्वःगु खः । थुगु म्ये थ्वःगु इलय् स्वकुमिपिन्सं नं उगु म्येय् हुलीगु परम्परागत प्याखं हुलाः लसता प्वंकूगु खः ।

ज्याझ्वलय् प्रोजेक्ट बाजा नेपालया हे सांगीतिक पुचःया वाद्यवादनय् राजिप बज्राचार्यं लाखे प्याखं न्ह्यब्वयादीगु खःसा थुकी श्याम नेपालीं म्वालि पुयादीगु खः ।

परम्परागत बाजं संरक्षण व प्रवद्र्धनया नितिं न्ह्यज्यानाच्वंगु प्रोजेक्ट बाजा नेपालया ग्वसालय् जुगु ज्याझ्वलय् मूपाहाँ कथं यल महानगरपालिकाया मेयर चिरिबाबु महर्जन, पाहाँ कथं यल महानगरपालिका वडा नं. २१ या वडाध्यक्ष रविन्द्र महर्जन, नेपाली काँग्रेसया यल महानगरपालिका समितिया सभापति राजेश महर्जन, सशस्त्र प्रहरी बल नेपाल वाद्यवादन गुल्म प्रमुख सशस्त्र प्रहरी वरिष्ठ नायब निरिक्षक तीर्थ ढुंगेल, पाटन म्यूजियमया सुरेश लाखे, कार्तिक नाच संरक्षण समितिया अध्यक्ष किरण चित्रकार, वरिष्ठ शास्त्रीय गायक प्रभूराज ढकालया ब्वति दुगु खःसा ज्याझ्वः सुरजवीर बज्राचार्यं न्ह्याकादीगु खः ।

उत्सवया ग्वसाः खलः प्रोजेक्ट बाजा नेपालया दुजःपिं छसिं कथं अध्यक्ष फिरोज बज्राचार्य, उपाध्यक्ष लक्ष्मीप्रसाद डंगोल, सचिव विश्वास बज्राचार्य, कोषाध्यक्ष विपु श्रेष्ठ व दुजःपिं राजिप बज्राचार्य, सुजित नापित, अनुप पौडेल व संजिव श्रेष्ठ खः ।

Categorized in कला