chetrapa55

प्रोजेक्ट बाजा नेपालया सांगितिक ब्वज्या शनिवाः यलया नासः चुकय्

नेवा: अनलाइन न्युज – ललेन्द्र शाक्य | २०७६ श्रावण २२, बुधबार १०:४६:१५

‘सिलु फेस्टिबल ईन दरबार’ नां बियाः प्रोजेक्ट बाजा नेपालया ग्वसालय् यलया मंगल बजाःया दरबार लागा दुनेया नासः चुकय् तःजिगु सांस्कृतिक ज्याझ्वः जुइगु जूगु दु ।

थ्वहे वइगु श्रावण २५ गते शनिवाः  सनिलया ५ ता इलय् उगु तःजिगु सांस्कृतिक ज्याझ्वः जुइगु जानकारी ग्वसाः खलः प्रोजेक्ट बाजा नेपालया दुजः लिसें संगीतकःमि फिरोज बज्राचार्यं नेवाः अनलाइनन्यूजयात जानकारी बियादीगु दु ।

ग्वसाः खलः प्रोजेक्ट बाजा नेपालं ब्यूगु जानकारी कथं उगु ज्याझ्वलय् बौद्ध द्यः प्याखं ब्वज्या जुइगु जूगु दु । उगु बौद्ध द्यः प्याखं कार्तिक नाच संरक्षण समितिपाखें न्ह्यब्वइगु जूगु दु ।

अथेहे, दाफा संगीतया प्रस्तुति नं जुइगु जानकारी बिसें ग्वसाः खकलं उगु दाफा संगीत ब्वज्या यलया गाःहितिइ च्वंगु चोबुँ गाःहिति हरि भजन मंकाः खलःपाखें न्ह्यब्वइगु जानकारी ब्यूगु दु ।

थ्वहे झ्वलय् उगु तःजिगु सांस्कृतिक ज्याझ्वलय् ग्वसाः खलः प्रोजेक्ट बाजा नेपाल पुचःपाखें सांगितिक ब्वज्या न्ह्यब्वइगु जूगु दुसा राजीप बज्राचार्यपाखें लाखे प्याखं न्ह्यब्वइगु जानकारी ब्यूगु दु ।

ज्याझ्वः स्वयेगु नितिं टिकटया ब्यवस्था मदूगु व सितिकं नासः चुकय् दुहाँ वनाः उगु सांस्कृतिक ज्याझ्वः सकस्यां स्वयेफइगु जानकारी बिसें ग्वसाः खलकं उगु ज्याझ्वः स्वयेत सकलसित सहभागिताया नितिं इनाप याःगु दु ।

Categorized in कला