ad 2076 5 18

प्रम ओलीयात हाकनं न्हूगु किडनी प्रत्यारोपण यायेमालेफूगु विकल्प !

नेवा: अनलाइन न्युज | २०७६ भाद्र ५, बिहिबार ११:३१:४३

प्रम ओली थौं हाकनं सिंगापुर भ्रमणय् वनीगु, गुलि दिं च्वनावइ अनिश्चित

प्रधानमन्त्री केपी शर्मा ओली थःगु उसाँय् परीषणया नितिं थौं बिहिवाः सिंगापुर वनीगु जूगु दु । सिंगापुरय् उसाँय् परीक्षण यानाः व.गु साउन २७ गते लिहाँवःम्ह प्रम ओली १० न्हु लिपा हाकन. थौं सिंगापुर भ्रमणय् वनेत्यंगु खः ।

चिकित्सकया सल्लाह कथं प्रधानमन्त्री ओली थौं बिहिवाः न्हिनय् १ः३० ता इलय् थाई एयर मार्फत सिंगापुर प्रस्थान यायेत्यंगु ओलीया प्रेस संयोजक चेतन अधिकारीं जानकारी ब्यूगु दु ।

ओलीलिसें प्रधानमन्त्री ओलीया जहान राधिका शाक्य, प्रमुख राजनीतिक सल्लाहकार विष्णु रिमाल, निजि चिकित्सक डा. डिब्या सिंहलिसें थीथी मनूत सिंगापुर वनीगु प्रधानमन्त्रीया सचिवालयं जानकारी ब्यूगु दु ।

प्रधानमन्त्री ओलीं सिंगापुरय् च्वंगु नेशनल युनिभर्सिटी हस्पिटलय् थःगु उसाँय् परीक्षण याकी । थ्वसिबें न्ह्यः नं प्रम ओलीं अन हे उसाँय् परीक्षण याकूगु खः । उसाँय् परीक्षणया नितिं थ्वसिबें न्ह्यः ९ न्हु सिंगापुरय् च्वनावःम्ह प्रधानमन्त्री ओली थौं बिहिवाः वनाः गुलि ई अन च्वनावइ धैगु विषयस छुं न. धाःगु मदु ।

प्रधानमन्त्री ओली जलास्यँ (किडनी)या ल्वगि खः । ओलीं १२ दँ न्ह्यः किडनी प्रत्यारोपण याकूगु खः । किडनी प्रत्यारोपण लिपा भारत व बैंकक वनाः उसाँय् परीक्षण यायेगु यानावःम्ह प्रधानमन्त्री ओलीं दथुइ स्वदेशय् हे वासः याःगु खः । तर, ओली वंगु साउन १८ गते सिंगापुर वंगु खः ।

किडनी प्रत्यारोपणया ल्वगिपिन्सं निश्चित ईलिपा वासः हिलेमाःगु चिकित्सकपिन्सं धाःगु दु । १२ दँ न्ह्यः किडनी प्रत्यारोपण याकूम्ह प्रधानमन्त्री ओलीयात नं वासः हिलेमाःगु खः धकाः धाःगु दु ।

न्हूगु वासः नं ज्या मयाःसा न्हूगु किडनी हाकनं प्रत्यारोपण यायेमालेफूगु विकल्प जुइ । ओलीं छु यायेगु धैगु निश्चित विचाः प्वंकूगु मदुनि । प्रधानमन्त्री स्वयं व वया सचिवालयं नं स्वास्थ्य स्थिति बारे विस्तृत रुपं छुं जानकारी ब्यूगु मदुनि ।

Categorized in राजनीति