ad 2076 5 18

प्रधानमन्त्री नापलायेत भारतीय विदेशमन्त्री जयशंकर नेपाः वइगु, थौं हे नापलाइगु

नेवा: अनलाइन न्युज | २०७६ भाद्र ४, बुधबार ११:१९:३१

भारतीय विदेशमन्त्री एस. जयशंकर नेपाः वयेत्यंगु दु । जयशंकर बुधवाः न्हिनय् थ्यंमथ्यं १२ ता इलय् येँया त्रिभुवन अन्तर्राष्ट्रिय विमानस्थलय् अवतरण याइगु भारतीय दूतावास स्रोतं जानकारी ब्यूगु दु ।

भारतीय विदेशमन्त्री जयशंकर नेपाः व भारत मंकाः आयोगया बैठकय् सहभागी जुइत नेपाः वयेत्यंगु खः । बैठक थौं बुधवाः व कन्हय् विहिवाः च्वनीगु जूगु दु ।

तर, जयशंकरं बैठक सुरु जुइन्ह्यः हे प्रधानमन्त्री केप िशर्मा ओलीयात नापलाइगु जूगु दु । प्रधानमन्त्री लिसेया नापलायेज्या न्हिनय् २ ता इलय् जुइगु क्वःछिनातःगु दु ।

वधुंकाः न्हिनय् हे ३ ता इलय् होटल याक एण्ड यतिइ ग्वसाः ग्वइगु नेपाः व भारत मंकाः आयोगया बैठकय् जयशंकर सहभागी जुइ । बिहिवाःतक न्ह्याइगु बैठकय् निगु पक्षीय स्वापू, आर्थिक सहकार्य, व्यापार व पारवहन, ऊर्जा व जलस्रोत, संस्कृति, शिक्षा लिसेंया विषयस सहलह जुइगु एजेण्डा तयार जूगु परराष्ट्र मन्त्रालयं जानकारी ब्यूगु दु ।

नेपाः च्वनीगु झ्वलय् विदेशमन्त्री जयशंकरं राष्ट्रपति विद्यादेवी भण्डारीयात नं नापलाइगु जूगु दु । राष्ट्रपति भण्डारीलिसे बिहिवाः सुथय् १०ः३० ता इलय् नापलायेगु क्वःछिनातःगु दु ।

भारतीय प्रधानमन्त्री नरेन्द्र मोदीया निक्वःगु कार्यकालय् विदेशमन्त्री जुइधुंकाः जयशंकरया थ्व न्हापांगु नेपाः भ्रमण खः ।

Categorized in राष्ट्रिय