ad 2076 5 18

प्रधानमन्त्री ओलीया ख्याच्वः, विमानस्थलय् ल्यनातुं च्वन सामन्ती प्रथा

नेवा: अनलाइन न्युज | २०७६ भाद्र २, सोमबार १६:३८:०१

भीआईपी कक्षया छ्यलाबुला यायेदुम्ह व्यक्तिं हे विमानस्थलया ड्युटीइ खेटजुयाच्वंम्ह प्रहरीयात जूगु हातपात सामान्य घटना खहे मखु । थुज्वःगु ज्या याःम्ह पारश शाहयात आः गणतान्त्रिक सरकारं गुज्वःगु कारवाही न्ह्यःने यंकी ? स्वये ल्यं दनि थ्व ।

तर, प्रधानमन्त्री केपी शर्मा ओलीं आइतवाः हे संसदय् सम्बोधन यायेगु झ्वलय् धाःगु खः, ‘सरकारया संयमयात स्वयाm छुं तत्वत अप्वयाः न्यासिचानाजुगु खनेदु ।’

प्रधानमन्त्रीं संसदं राजाबादीपिन्त ख्याच्वः बिसें धाःगु खः, ‘ती शक्तिहरु म्वानाच्वंगु इलय् इमित जिमिसं ठेगान लगेयानागु खः । आः दीपय् वनाः क्वँय् पुयाः उगु संस्था लितहये धैगु कथंया नं परिकल्पना यानाः तिंन्हुया जूगु खनेदु । थ्व बेमौसमया बाजा मथाःसां ज्यू ।’

तर, प्रधानमन्त्रीं थथे धाःगु दिं हे अन्तर्राष्ट्रिय विमानस्थल दुने हे दुहाँ वनाः राजतन्त्रया पक्षय् नारा थ्वयेकेत सरकारं गुकथं छूट बिल ? जबकि प्रधानमन्त्रीं संसदं धाःगु खः, ‘सरकारया आलोचनाया नामय् प्रणाली उल्टे याये धाइपिं, प्रतिगमन याये धाइपिं, संविधान अस्वीकार याये धैगु खँत आःया सरकारयात मान्य जुइमखु ।’

संविधान सम्मत ढंगं चलेजुइगु खँय्, संवैधानिक दायरा दुने चलेजुइगु खँय् सरकारं अतिकं प्रशन्नतापूर्वक विरोध व आलोचनाया लसकुस यायेगु धासें प्रधानमन्त्री ओलीं धाःगु दु, ‘जिं खुलस्त जुया धाये कि, संविधान, लोकतन्त्र, गणतन्त्र, संघीयता, जनताया शासनविरोधी क्रियाकलापत सरकारया उदारता व सहिष्णुतापाखें थुज्वःगु क्रियाकलापत संचालन याइगु तत्वत न्यासिमचाःसा ज्यूगु खः । ...सरकारं थ्व उदारता क्यंगु पत्याः मजुयाः खः धैगु जिं धाये ।  पत्याः मयाःगुलिं खः, पत्याः याःगु दिं संविधानया, व्यवस्थाया, प्रणालीया, लोकतन्त्रया, गणतन्त्रया रक्षाया नितिं सरकार मैदानय् क्वाहाँ वइ ।’

विमानस्थलय् ल्यनातुं च्वन सामन्ती प्रथा

अथेला, विमानस्थलय् नेतात वनीबलय् समर्थकपिनिगु भीड मुनीगु सामन्ती प्रथा या प्रचलन गणतन्त्रय् नं जारी हे जुयाच्वंगु दु ।

विमानस्थल दुने भीड मुंकाः होहल्ला यायेगु ज्याय् राजपरिवारया दुजः जक दोषी मखु, थःत गणतन्त्रया न्ह्यलुवाः तायेकीपिं नेतात नं विमानस्थलय् वयेवने याइबलय् थिकेगु स्वां ज्वनाः लाइन च्वनीगु चलन गणतन्त्रय् नं मदुगु मखु ।

कोमल शाहया विदाइया नितिं परिवारया दुजःपिं विमानस्थल वनेगु स्वाभाविक हे खः । तर, अन ज्ञानेन्द्र–कोमलया किपाः दूगु टिसर्ट फिनाः नाराबाजी याइपिं समर्थकपिन्त तकं सहज रुपं दुकायेगु यात । इपिं अन्तर्राष्ट्रिय विमानस्थलया प्रस्थान कक्ष न्ह्यःने हे थ्यंकाः राजतन्त्रया नारा थ्वयेकेत व  गणतन्त्रयात ब्वःबिइत सफल जुल ।

आइतवा: वहे सामन्तकालीन बेथिति कोमल शाहया बैंकक भ्रमणय् दोहोरे जूगु खः । बैंककय् दुम्ह पूर्वराजा ज्ञानेन्द्र शाहयात नापलाः वनेगु झ्वलय् कोमल शाह जुलुसया लिसें विमानस्थ थ्यंकूगु खः ।

थुलितकया ला भद्रगोल ला जुल, तर ड्यूटीइ दुम्ह छम्ह प्रहरीं थःगु कर्तव्य निर्वाह यायेत्यंबलय् गुण्डागर्दीया शैलीं पारश शाहपाखें गुकथं हातपात जुल, व लूपाखें देसय् अझ नं सुं मनू कानूनसिबें च्वय् हे दनी धैगु क्यंगु दु ।

Categorized in राजनीति