telecom 18 kartik 2076

पारसलिसे सोनिकाया सःतीगु स्वापू (भिडियो)

नेवा: अनलाइन न्युज | २०७६ आश्विन २८, मंगलबार १२:०३:५५

थौंकन्हय् सामाजिक संजाल टिकटिकय् नेपाःया पूर्व युवराज पारस शाहया छगू भिडियो भाइरल जूगु दु । सुमन नांया अकाउण्टं अपलोड यानातःगु उगु भिडियोय् पूर्वयुवराज पारस शाह थः छम्ह शुभेच्छुकलिसे तर्क यानाच्वंगु खनेदु ।

भिडियोय् पारसं थः शुभेच्छुकयात सुनानं थःत राजावादी मधायेत धासें फुक्क नेपाली जूगु धाःगु दु ।

हार्लि डेभिडसन मोटरसाइकलय् हेलमेट पुयाः च्वनाच्वंम्ह पारसं धाःगु दु, “थ्व वादी व वादी धकाः छुटेयायेगु मखु, फुक्क नेपाली खः ।”

तर, १५ सेकेन्डया थुगु भिडियोया इन्डिङ मेगु हे तरिकां जुइ । भच्चा तापाक्कं छम्ह बांलाःम्ह मिसा वइ व सरासर पारसया मोटरसाइकलया ल्यूने सिटय् च्वनी । वधुंकाः पारसं थःगु बाइक ब्वाकियंकी ।

थ्व सुं अपरिचित मिसा धाःसा मखु । उम्ह मिसा खः, यूट्युबर सोनिका रोकाया । यूट्युबय् उछृङ्खल व अश्लिल संवादतय्गु भिडियो दयेकाः चर्चाय् वःम्ह सोनिका लिपांगु इलय् पूर्वयुवराज पारसलिसे तःक्वःमछि खनेदयाच्वंगु दु । थ्वसिबें न्ह्यः नं छगू नाइट क्लबय् पारस पृष्ठभूमिइ खनेदयेक सोनिकाया छुं टिकटक भिडियो वःगु खः ।

स्वम्ह काय् म्ह्याय् दुम्ह पारसया ताःई न्ह्यःनिसें थः कलाः हिमानीलिसे स्वापू बांलानाच्वंगु मदु । बैंककय् च्वंबलय् पारस छम्ह थाई मिसालिसे मतिनाय् लाःम्ह खः । नेपाः लिहाँ वयेधुंकाः नं पारस सुध्रेजूगु लक्षण खनेमदु । लिपांगु इलय् सोनिकालिसे पारसया निकटतायात कयाः सामाजिक संजालय् थीथी टिकाटिप्पणी जुयाच्वंगु दु । गुलिसिनं इपिं मतिनाय् तक्यनेधुंकूगु अड्कल नं याःगु दु ।

अथेला सोनिकालिसे पारसया मित्रपा जक नं जुइफु । क्लबय् नापं च्वनीबलय् बाय् बाइकय् नापं वनीबलय् व मनिता प्रमाणित जुइमखु । हाकनं सोनिका न्ह्यात्थे जूसां चर्चाय् वयेचाहेजूम्ह मिसा खः । वं चर्चाया हे नितिं पारसयात अस्त्र दयेकेत्यंगु नं जुइफु ।

भिडियोय् आपासिनं पूर्वयुवराजथें जाःम्ह मनुखं छम्ह उछृङ्खल मिसालिसे थथे प्यपुनाः वनाच्वंगु शोभनीय खनेमदुगु टिप्पणी याःगु दु । गुलिसिनं धाःसा ‘खनला छिमिसं जुजुलानी ?’ धकाः राजावादीपिन्त व्यंग्य नं याःगु दु ।

भाइरल भिडियो पोखराया जूसां नं गनथाय् च्वंगु व गुबले खिचेयाःगु खः धैगु धाःसा सीमदुनि ।

(थन क्लीक यानाः भिडियो स्वयादिसँ)

Categorized in बजाः