ad 2076 5 18

पाकिस्तानं काश्मीर मामिलाय् नेपाःया ग्वाहालि माग यात

नेवा: अनलाइन न्युज | २०७६ भाद्र ६, शुक्रबार १३:३९:५१

भारतीय विदेशमन्त्री सुब्रमन्यम जयशंकर येँया निन्हुया भ्रमण क्वचायेकाः दिल्ली लिहाँ वनेखतं पाकिस्तानी विदेशमन्त्रीं काश्मीर मामिलाय् नेपाःयाके ग्वाहालि माग याःगु दु ।

पाकिस्तानी विदेशमन्त्री शाह महमूद कुरैशीं परराष्ट्रमन्त्री प्रदीप ज्ञवालीयात टेलिफोनपाखें काश्मीरया लिपांगु अवस्थाया जानकारी बिसे. नेपाःया भूमिका माग याःगु खः । बिहिवाः सनिलय् काश्मीर मामिलाया बारे टेलिफोन वार्ता जूगु ज्ञवालीं पुष्टि याःगु दु ।

मन्त्री ज्ञवालीं धाःगु दु, “वय्कलं जितः फोन यानाः काश्मीर अवस्थाबारे जानकारी याकुसें सीमा क्षेत्रय् तनाव अप्वःगु धाःगु दु । नेपालं थुगु परिस्थितिइ थःगु भूमिकाया बारे विचाः या धासें वय्कलं पाकिस्तानी दृष्टिकोण व अनया अपडेट याकूगु खः ।”

लिसलय् थःम्हं काश्मीर समस्याया हल निगुलिं देस दथुया संवादपाखें पिकायेमाःगु धयागु मन्त्री ज्ञवालीं जानकारी ब्यूगु दु ।

नेपालं काश्मीरय् विकसित घटनाक्रमयात लिक्कं स्वयाच्वनागु व थःपिं क्षेत्रीय शान्ति व स्थिरताया पक्षय् दूगु मन्त्री ज्ञवालीं धाःगु खः ।

भारत प्रशासित काश्मीरया स्वायत्तता खोसे जुइधुंकाः उगु क्षेत्रय् तनाव ब्वलनाच्वंगु दु । थ्वहे दथुइ पाकिस्तानं थ्व मुद्दायात अन्तर्राष्ट्रियकरण यानाच्वंगु दु । काश्मीरयात स्वतन्त्रता बिइमाःगु धासें पाकिस्तानं सार्क मुलुकलिसे नं लबिङ न्ह्याकूगु दु ।

Categorized in अन्तर्राष्ट्रिय