telecom 18 kartik 2076

पवन जोशीया ‘नेवाः मां–बाया नेवाः मचात...’ म्यूजिक भिडियो, स्वन्हुया दुने झिद्वः भ्यूअर्स

नेवा: अनलाइन न्युज – ललेन्द्र शाक्य | २०७६ कार्तिक २१, बिहिबार १४:०४:३४

धुँदेय् प्रोडक्सन प्रा.लि.या न्ह्यब्वया ‘नेवाः मां–बाःया नेवाः मचात...’ बोलया म्यूजिक भिडियो आः नकतिनि जक यूट्युब च्यानल हाईलाइट्स नेपालय् अपलोड जूगु दुसा थ्यंमथ्यं गुद्वःम्ह मनूतसें स्वयेधुंकल ।

सन्तानप्रतिया माया ममताया लिसें सन्तानप्रतिया मांअबुया कर्मयात न्ह्यब्वयातःगु उगु म्येय् समाजय् काय् पिन्त स्कूल छ्वइगु व म्ह्याय् पिन्त छेँज्या याकीगु परम्परायात रुपान्तरण यायेगु कथं चेतना ब्वलंकाः न्ह्यब्वयातःगु दु ।

मांअबुपिन्सं न्हिथं ज्याला मजदुरी ज्या यानाः थः म्ह्याय् पिन्त शिक्षादीक्षा ब्यूगु लिसें परम्परागत ऐतिहासक नखःचखःयात ल्यंकातयेमाः धैगु शिक्षा व चेतना नं बिइत ताःलाःगु दु थुगु म्येया म्यूजिक म्यूजिक भिडियो ।

थुगु म्येया च्वमि किपूया रामभक्त महर्जन रमझम खःसा संगीत किपूया नांजाःम्ह संगीतकार गुज्ये मालाकारं लसय् हनादीगु दु ।

अथेहे, थुगु म्येय् किपूया लोकंह्वाःपिं नांजाःपिं म्येहालामिपिं रत्नशोभा महर्जन, दीपा महर्जन, रानीशोभा महर्जन व वीरमाया महर्जनपिन्सं सः बियातःगु दु ।

जीवन पासाया श्रृंगारय् अनु महर्जनं हुलाप्याखं स्यनातःगु थुगु म्येया म्यूजिक भिडियो किपूया नांजाःम्ह क्यामेरा पर्सन राजेश महर्जनं छायांकन व सम्पादन यानादीगु दुसा निर्देशन किपूया हे वरिष्ठ कलाकार निर्देशक च्वमि पवन जोशीं यानादीगु दु ।

किपूया बरिष्ठ प्याखं च्वमि कलाकार रामकृष्ण धिनालिसें जमुना महर्जनया मू भूमिका दूगु थुगु म्यूजिक भिडियोय् सुधा, अजला, नसला, नमिला, खुशी, सोेफी, गोपीलाल तुयू व मिलन श्रेष्ठपिन्सं नं अभिनय यानादीगु दु ।

Categorized in कला