swastha 76 12 19

पदच्यूट जुजु ज्ञानेन्द्र शाहयात ‘जेट प्लस’या सुरक्षा

नेवा: अनलाइन न्युज – ललेन्द्र शाक्य | २०७६ चैत्र ११, मंगलबार ०९:०२:५५

नेपालय् पदच्यूट जूम्ह पुलांम्ह जुजु ज्ञानेन्द्र शाह छुं दिं न्ह्यः भारतया भ्रमणय् वंबलय् ‘जेड प्लस’ स्तरया सुरक्षा ब्यूगुलिं नेपाःया नेतापिं अतिकं चिन्तित जूगु दु । ‘जेड प्लस’ उच्च व महत्वपूर्ण कथं कयातःपिं व्यक्तित्वपिन्त बिइगु सुरक्षा खः ।

खासयानाः नेकपा नायः पुष्पकमल दाहाल प्रचण्डं भारतय् पुलांम्ह जुजुयात ब्यूगु महत्वयात कयाः थः लिक्क लाःपिंलिसे व्यापक चिन्ता प्वंकूगु खँ सीदूगु दु ।

अथेहे, कांग्रेस सभापति शेरबहादुर देउवा, आरजु राणा व विमलेन्द्र निधि नं भारतय् पुलांम्ह जुजुयात ब्यूगु विशेष सम्मानयात कयाः चिन्तित जूगु धाःगु दु ।

लुमंकेबहःजू, वंगु फागुनया न्हापांगु वाः भारत भ्रमणय् वंम्ह पुलांम्ह जुजु ज्ञानेन्द्र शाह वहे महिनाया १८ गते स्वदेश लिहाँ वःगु खः । शाहयात न्हूदिल्लीइ च्वंगु विमानस्थलय् क्वाहाँ वयेखतं हे ‘जेड प्लस’ सुरक्षा ब्यूगु खः ।

ज्ञानेन्द्र शाह च्वंगु प्रिन्सेस होटलया पिने ‘जेड प्लस’ सुरक्षा पुचः अहोरात्र खटेजूगु खःसा दिल्लीपाखें पंजावया अमृतसर थ्यंकूबलय् व लिहाँ वःबलय् नं शाहयात वहे सुरक्षाया व्यवस्था याःगु खः ।

भारतय् च्वंबलय् उच्चस्तरीय भेटघाट व सहलसह सहभागी जूम्ह पुलांम्ह जुजु ज्ञानेन्द्र शाहपाखें भारतीय संस्थापनया प्रभावकारी व अति उच्च तहया नेतापिंलिसे सहलह जूगु धाःगु दु । गुलिखे बैठक ला नापं दिल्ली थ्यंकूम्ह नीजि सचिव सागर तिमिल्सिनायात तकं खबर मब्यूसे जूगु दु धकाः धाःगु दु ।

दिल्लीपाखें लिहाँ वःगु निवाः हे मफुइकं पुलांम्ह जुजु शाह वंगु वाः चैत्र २ गते येँपाखें झापा प्रस्थान याःगु खः । झापाय् च्वंबलय् शाहपाखें थीथी व्यक्तिपिंलिसे भेटघाट व सहलह जूगु खँ सीदूगु दु । ज्ञानेन्द्र शाहनाप कांग्रेस नेता विपीन कोइरालालिसे नं गम्भीर वार्तालाप जूगु जानकारी वःगु दु ।

(घटना व विचार पत्रिकापाखें)

Categorized in पत्रपत्रिका