chetrapa55

पचली भैरव–तेप जात्रा व्यवस्थित यायेगु नितिं सहलह मुँज्या

नेवा: अनलाइन न्युज – विजयरत्न | २०७६ आश्विन १३, सोमबार १५:२२:२१

पचली भैरव जात्रा व्यवस्थापन समितिपाखें जात्रायात सभ्य व भव्य यानाः न्ह्याकेत छगू सहलह मुँज्या शुक्रवाः टेकुया पचली भैरव द्यःया परिसरय् जूगु दु ।

क्वःनेया थकू जुजुया सन्तति जयराम मल्लया सभापतित्वय् न्ह्याःगु उगु सहलह मुँज्याय् थीथी व्यक्तिपिन्सं पचली भैरवया तेप आःजु जात्रायात बांलाक न्ह्याकाः यंकेत गुकथंया रणनीति दयेकाः न्ह्याःवनेमाः धैगु  विषयवस्तुयात कःघाना थःथःगु धारणा प्वंकूगु खः । 

मिसा कवःया कजि मचानानी महर्जनं लसकुस न्वचू बिया जात्राय् मिसापिन्सं न्ह्याकीगु खँतसें उगु सहलह मुज्या न्ह्याःगु खः ।

ज्याझ्लय् लायकू कुमारीया चिताइदार एवं इन्द्रजात्रा व्यवस्थापन समितिया नायो गौतम शाक्य, नेता तीर्थराम डंगोल, बाजं उपसमितिया कजि पुष्परत्न प्रजापति, समितिया सल्लाहकार ध्यानगोविन्द रञ्जित, स्वयंसेवकया कजि भुषण बज्राचार्य, प्रचार प्रसारया कजि राजु नापित, व्यवस्थापन समितिया कजि बालकृष्ण महर्जन, सभापति जयराम मल्लपिन्सं थःथःगु नुगः खँ प्वंकूगु खः । 

श्री पचली भैरव अर्थात् तेप जात्रा थ्वहे वइगु कौलाथ्व चौथी व पंचमी (२०७६ आश्विन १५ व १६ गते) बुधबाः व बिहिबाः तःजिक जुइत्यंगु दु । पचली भैरव  तेप जात्राया झ्वलय् असोज १२ गते श्री पचली भैरवया तेप आःजुयात द्यःसिंया छेँय् नं कोहिति पुंयाथाय् बिज्याकीगु, १५ गते पुंया छेँय् नं लँपु छाय् सिधयेकाः थकु जुजुयाथाय् बिज्याकीगु, अले बहनी ७.३० ता इलय् थकु जुजुथासं झासु फल्चा थ्यंकीगु, वहे बहनी गमे तयेगु ज्या याइगु जूगु दु  ।

थुकथं हे १६ गते सुथय् करीव १० ताः इलय् ताः छुइगु, ताः कसेयायेगुया लिसें न्हिनय् श्री रुद्र विनायक गणेद्यःयात ख्वाःसिकेगु नितिं श्री आजुयाथाय् पुजाया नितिं इनाप याकीगु जूगु दुसा सनिलय् थकालीपाखें पुजा यानाःलि गुरुजु पल्टन व गथु बाजंयालिसें श्री रुद्र विनायक गणेद्यः व पचली भैरवया जात्रा न्ह्याकीगु खँ ग्वसाः खलःपाखें पितब्यूगु ज्याझ्वःया धलखय् न्ह्यथनातःगु दु ।

थुकथं हे प्रचार प्रसार उप कमितिं ब्यूगु जानकारी कथं जात्राया लँपु पचली पीठ, टेकू, पुखुसी, इनाखा, गोफ, लगं ज्याबहाः, न्हूघः, चिकंमुगः, मरु, हनुमानध्वाखा, मरु, चिकं मुगः, न्हूघः, ज्या बहाः, दलाछी, ब्रम्हत्वाः, श्वेतभैरव, दलाछी, ज्याबहाः यंगाः द्यःछेँ  यंकेगु धकाः न्ह्थनातःगु दु ।

थुगु जात्रा क्वःनेया छगू तःजिगु जात्राया रुपय् कयाः वयाच्वंगु दुसा थुगु जात्राया झ्वलय् हे लायकूया श्री कुमारीनाप पचली भैरवया दृष्टि चूलाकेमाःगु नं परम्परा दयाः वयाच्वंगु दु ।

Categorized in नेवाः