ad 2076 5 18

न्यूजअपडेटः नेपाल त्यात, मलेसिया बुत

नेवा: अनलाइन न्युज | २०७६ श्रावण ८, बुधबार ११:३३:१०

नेपालं मलेसियायात ७ विकेटं बुकूगु दुसा टी–२० विश्वकप छनोटया एसिया फाइनलय् नेपालं न्हापांगु जित ल्हातय् लाकूगु दु । ज्ञानेन्द्र मल्लया कीर्तिमानी अर्धशतक लिसें नेपालं मलेसियायात बुकूगु खः ।

थ्व जितलिसें नेपाःया ग्लोबल छनोटय् थ्यंनीगु सम्भावना कायम हे दु । थुकिया नितिं कतारलिसे अप्रत्यासित हार ब्यहोरे याःगु नेपालं ल्यंदूगु कासा धाःसा त्याके हे माः ।

वा वःगु हुनिं ९ ओभरय् चीहाकः याःगु कासाय् मलेसियां ब्यूगु ८४ रनया लक्ष्य नेपालं ६ बल ल्यंदुबलय् ३ विकेट गुमेयानाः नापलाकूगु खः ।

च्यागूगु ओभरया लिपांगु बलय् छक्का प्रहार यासें नेपाःयात त्याकेत ताःलाःम्ह विनोद भण्डारी १३ रनय् अविजित जूगु खः ।

ज्ञानेन्द्र मल्लया कीर्तिमानी अर्धशतक

नेपाःया जितय् ज्ञानेन्द्र मल्लं कीर्तिमानी अर्धशतक दयेकल । आक्रामक  पारी म्हितूम्ह मल्लं २१ बलया सामना याःगु खःसा वं ५ चौका व ३ छक्काया ग्वाहालिं ५१ रन दयेकूगु खः । थ्व नेपाःमि कासामिं दकले म्हो बलय् दयेकूगु अर्धशतक खः ।

थ्वसिबें न्ह्यः टस बुकाः ब्याटिङया पाः काःम्ह मलेसियां ९ ओभरय् ७ विकेट गुमेयानाः ८३ रन दयेकूगु खः । वया नितिं सफिस शरीफं १५ बलय् ३० रन दयेकूगु खःसा भिरनदीप सिंहं २१ रन मुंकूसां नं मेमेपिं ब्याट्सम्यानं उलि ल्याः मुंकेमफुत ।

सोमपाल कामीं ३ विकेट काःगु खःसा बसन्त रेग्मीं २ विकेट थःगु नामय् तःगु खः ।

Categorized in कासा