chetrapa55

नेवाः सांस्कृतिक ज्ञान कोश पिहाँ वइगु

नेवा: अनलाइन न्युज – विजयरत्न | २०७६ मङ्सिर १९, बिहिबार १४:०१:१४

नेपालभाषा एकेडेमीया कुतलय् नेवाःतय्गु साँस्कृतिक पक्षया दक्व खँ दुथ्याकाः छगू साँस्कृतिक ज्ञान कोश दयेकीगु जूगु दु ।

थज्याःगु कोश दयेकेत छु छु खँ दुथ्याकेमाली धकाः सहलह ब्याकेत नेवाः समुदाय दुने प्रतिष्ठित बौद्ध व्यक्तित मुनाः छगू पूर्व तयारी कार्यशाला बुधवाः नगरकोटय् जुल ।

ज्याझ्वयाः उलेज्या यासें शताब्दी पुरुष सत्यमोहन जोशीं थ्व दक्व नेवाःतय्गु दुग्यंक म्हसीका बिइगु मुंकेबहःगु ग्रन्थ जुइगुलिं सकसिनं बांलाक सहलह यानाः मजिमगाःगु खँ दक्व दुथ्याकाः पितबिइत इनाप यानादिल ।

उगू पूर्व तयारी कार्यशाला ज्याझ्वलय् उगु ज्ञान कोशया संयोजक यज्ञमानपति वज्राचार्यं थज्याःगु ज्याय् सकसिनं ग्वाहालि यायेमाःगु खँ तसें थम्हं चाःथें उकिइ दुथ्याकेमाःगु विषयया बारे खँ न्ह्यथना ज्यापौ न्ह्यब्वयादिल ।

थुगु कार्यशालाया परिचय बिसें मेगु ज्यापतिइ नेपालभाषा एकेदमिया सदस्य सचिव मल्ल के सुन्दरं थ्व छगू अभूतपूर्व मौका जूगुलिं दक्वसियां थःथःगु क्षेत्रया ज्ञान दक्व प्वंकाः थुकियात छगू पूर्ण ग्रन्थ दयेकेमाःगु खँ कनादिल । वय्कल‌ थुगु ज्ञानकोशया प्रारुप नं न्ह्यब्वयादिलसा एकेदेमिया दांभरी डा. पुष्पराज राजकर्णिकारं नं नुगः खँ तयादीग खः ।

ज्याझ्वलय् ब्वति काःपिं सकसिनं भाषा, साहित्य, लिपि, कला, स्थापत्यकला, मूर्तिकला, बास्तुकला, नसात्वँसा, पुँसा, तिसा, नखः, चखः, पर्व, जात्रा, रिति, परम्परा, आस्था, संस्कृति, नेवाः म्हसीका, इतिहास आदि विषय् छु छुँ खँ दुथ्याकेमाली धकाः थःथःगु बिचाः तयादिल । उकिया लागि सहभागीपिन्त न्हय्गू ब्वय् ब्वथलाः पुचःपुचः सहलह ब्याकूगु थ्व कार्यशालाय् एकेदेमिया भाइस चान्सलर यज्ञरत्न धाख्वाःनं नुगःखँ तयादीगु खःसा ज्याझ्वः एकेदेमिया चान्सलर चित्तरन्जन नेपालीया सभानायःसुइ जूगु खः ।

नेपालभाषा एकेदमिया ग्वसालय् जूगु उगु ज्याया लागि येँ, यल ख्वपं ६० म्हति विज्ञपिं व मेमेपिं सहभागी जूगु खः।

थनं प्राप्त जूगु दक्व विषययात कःघानाः एकेदमिं छगू प्रस्तावना तयाः येँ महानगरपालिकायाके आर्थिक ग्वाहालि फ्वनीगु अले येँया हे आदिबासी नेवाःत जूगुलिं थज्याःगु ज्याय् ग्वाहालि यायेत महानगरपालिका सैद्धान्तिक कथं सहमत जूगु खँ आयोजकं धाःगु दु ।

Categorized in नेवाः