ad 2076 5 18

नेवाः पत्रकार राष्ट्रिय दबू् येँ जिल्लाय् अरविन मान सिं

नेवा: अनलाइन न्युज | २०७६ भाद्र ७, शनिबार २३:०५:३८

नेवाः पत्रकार राष्ट्रिय दबू् येँ जिल्ला स्वक्वःगु तःमुँज्या शनिवाः सासा बांय्क्वेट बिशाल बजारय् नातिकाजी महर्जनया नायःसुइ क्वचाःगु दु ।
दबूया छ्याञ्जे प्रजित शाक्यं लसकुस न्वचू तयाः रेखा शाक्यं न्ह्याकूगु उगु ज्याझ्वलय् मूपाहाँ कथं येँ महानगरपालिकाया प्रमुख मेयर विद्या सुन्दर शाक्य व विशेष पाहाँकथं वरिष्ठ फोटो पत्रकार गोपाल चित्रकार, पाहाँपिं प्रदेश सभासद राजेश शाक्य, जीवन डंगोल व केन्द्रीय नायः श्रीकृष्ण महर्जन झायादीगु खः ।
नेवाः पत्रकार राष्ट्रिय दबूयास्तर बृद्धि व सुथां लाक्क न्ह्याकेया नितिं ज्याकूया भवनया नितिं महानगरपाखें फूचाःगु ग्वाहालि यायेगु बचं सभासद शाक्यं बियादीगु दु ।
नेवाः संस्कृतिया प्रतिबिम्ब धैगु नेवाः पत्रकार खः अथेजुयाः थुकियात थकायेगु कुतः झीसं यायेमाःगु खँ प्रदेश सभासा जीवन डंगोलं कनादिल ।
दबूया पत्रकारपिन्तं उत्साहित जुयाः न्ह्याःवनेत येँ महानगरपालिकापाखें न्यागू लख अक्षय कोष तयेगु कुतः जूगु खँ मेयर शाक्यं धयादिसें स्थानीय सरकार व पत्रकार दबू नापनापं न्ह्याःवनेमाःगु खँ कनादिल  ।
ज्याझ्वलय् येँ जिल्ला नायः नातिकाजी महर्जनयात दोसल्लां न्येकाः हनाबना याःगु दु । अथेहे विष्णु नाति फोटो पत्रकारिता सिरपाः कोषया नितिं नातिकाजी महर्जनं छगू लख व नीन्याद्वःतका दां कोषया नायः दानदास श्रेष्ठयात लःल्हाःगु दु ।
नेवाः पत्रकार राष्ट्रिय दबू येँ जिल्ला शाखाया न्हूगु नेतृत्वय् अरविन मान सिं जिल्ला नायः जुयादिगु दुसा १५ दुजः दुगु ज्या सना पुचः निस्वंगु दु ।

बुखँ नेवाः सूचना केन्द्र

Categorized in नेवाः