ad 2076 5 18

नेवाः गुथियारपिनिगु गुथि हरण यानाः राज्यं जुकेगु दाउ !

नेवा: अनलाइन न्युज | २०७६ जेठ २४, शुक्रबार १६:०५:५४

नेवाःतय्त बेदखल यायेगु तःधंगु षडयन्त्र

–विजयकृष्ण श्रेष्ठ

अथेला गुथि संस्थानं हे झीगु तजिलजिनाप स्वानाच्वंगु जग्गा, जमिन, देगः, सतः, फल्चा इत्यादीया तैनाथी कयातये धुंकल । तैनाथी धइगु ला कमाण्डरसिप जक खः, ओनरसिप मखु, अर्थात् स्वामित्व मखु । तर लिपांगु इलय् गुथि संस्थानं गुलिखे थासय् थःगु हे स्वामित्व भाःपियाः लिजय् बियाः बहाः नयेगु, त यायेमाःगु रीतिथिति परम्परा मन्ह्याकेगु ज्या यानाहल ।

न्हूगु रेटं बहाः उठे यानाः नःसां खर्च खर्च धाःसा राणाकालीन दस्तुर अनुसार जक खर्च याइगु । अथे जुइबलय् रकमी व ठेकेदारतसें खःथें च्वंक दस्तुरी ज्या याना वा ज्या हे मयाःसें नं नइगु जुल । मेखे द्यःप्याखं न्ह्याकेमाःपिं निसें पूजापाठ याइपिं नं गुथि संस्थानया हाकिमतय् चाकरी यानाः जुइमाःगु नं जुल ।

अथे खःसां थौंतक गुथि न्ह्याकेगु ज्या सम्बन्धित गुथियारतसें हे यानाः वयाच्वंगु खः । गुथियारतसें हे देगः, द्यःछेँ न्ह्याकाः द्यःपाःलाः च्वनाः न्ह्याकाः वयाच्वंगु खः ।

नेवाःतय्त बेदखल यायेगु तःधंगु षडयन्त्र

आः गुथि सम्बन्धय् व्यवस्था यायेत हःगु विधेयकय् परम्परां वयाच्वंगु जूसां, लालमोहर तयाः बियातःगु जूसां, सदन पिकयाः बियातःगु जूसां गुथियारतय्गु गुथिया देगः, द्यःछेँ, सतः, फल्चा इत्यादीइ हक मदइगु धाःगु दु ।

थुगु ऐन गथे खः अथेहे पारित जुल धाःसा महाँकाःद्यः व पाःलाःद्यःया द्यःपाःलाः नं गुरुजुत मजूसे राष्ट्रिय गुथि प्राधिकरणं नियुक्त याःम्ह मनू जुइ । लाखे नं लाखननीया रंजितकारपिन्सं मन्ह्याकुसे प्राधिकरणं नियुक्त याःम्ह मनूया खटनय् न्ह्याकेमाःगु जुइ, लाखे प्याखं हुइकाः छुं फाइदा मजुइगु खत धाःसा बन्द यानाहइ ।

अथेहे, मरु गणेद्यःया द्यःपाःलाः नं ज्यापुत मजुसे प्राधिकरणं नियुक्त याःपिं मनूत जूवइ, द्यःछेँ नं प्राधिकरणया स्वामित्वय् वनी । थुज्वःगु खतरनाक प्रावधान थुगु विधेयकय् दु ।

थ्व दक्वसिबें ग्यानापुगु खँ खः । गुथि थुलि जक मखु, गुथिया स्वामित्वय् दूगु जग्गा जमिनय् नं गुथियारतय्गु गुगुं हक दइमखु । थुकथंया आपालं जमिन ला आः हे मदयेधुंकल । मदुगुली गुथिायरतसें हे गुथि संस्थानया मनूतय्त ल्हाःतय् कयाः रैकर दयेकाः तल । तर आः गुथियारतसें नयेगु व गुथिया जागिरदारतसें ज्याखँ जक मिलेयाइगु जमाना मखसे तप्यंक हे गुथि प्राधिकरणया ल्हाःतय् जग्गा जमिन वनीगु जुल ।

रणबहादुर शाह थः कलाः कान्तिमती तःकै नं सीधुंकाः वँय् जुयाः ब्रम्हुतय्गु बिर्ता नं हरण यात, गुथियारतय्गु गुथि नं हरण यात धाइ । व ला वेँय् जुजुया ज्या जुल, तर आः आल्पसें हे गुथियारतय्गु गुथि हरण यायेगु व राज्यया प्राधिकरणं हे थःगु स्वामित्व व खटनय् संचालन यायेगु खतरनाक षडयन्त्र जूगु खनेदु ।

Categorized in बिचा: