nepal lifef 2076 8 8

नेपालभाषा एकेदेमिया १८ क्वःगु दँ मुँज्या क्वचाल

नेवा: अनलाइन न्युज – विजयरत्न | २०७६ श्रावण २८, मंगलबार १३:४९:१०

नेपालभाषाया वाङमय ख्यलय् छगू प्राज्ञिक संगठन कथं नीस्वनातःगु नेपालभाषा  एकेदेमिया १८ क्वःगु दँ मुँज्याः थौं मंगलवाः किपूया २ वडा द्यःध्वाखाया न्यामासिमाय् च्वंगु थःगु सभा भवनय् क्वचाःगु दु ।

उगु ज्याझ्वलय् एकेदेमिया संरक्षक वाङमय शताब्दी पुरुष, संस्कृतिविद् डा. सत्यमोहन जोशी मूपाहाँ कथं झायादीगु खः।                                

नेपालभाषा एकेदेमिया चान्सलर चित्तरन्जन नेपालीया सभानायःसुइ जूगु ज्याझ्वलय् एकेदेमिया सदस्य सचिव मल्ल के. सुन्दरं दच्छिया प्रगति विवरण न्ह्यब्वयादीगु खःसा दाँभरी पुष्पराज राजकर्णिकारं आर्थिक प्रतिवेदन न्ह्यब्वयादीगु खः ।

दँ मुँज्याय्  जनकवि दुर्गालाल श्रेष्ठ, भाषाविद् हितकरवीर सिंह कसाः, भाषासेवीलिसें साहु लक्ष्मीदास मानन्धर, डा. सुमनकमल तुलाधर व मूपाहाँ शताब्दी पुरुष डा. जोशीपिन्सं नुगः खँ तयादीगु खः।  

अथेहेतुं उगु दँ मुँज्या ज्याझ्वलय् नेपालभाषा एकेदेमिया पार्षदय् साहित्यकार निर्मलमान तुलाधर, नांजाम्ह नृत्यांगना कलाकार नारायणदेवी प्रधान, साहित्यकार शाक्य सुरेन, पत्रकार सुरेशकिरण मानन्धर, चित्रकार एकाराम सिं व साहित्यकार पुर्ण मुनकःमिपिन्त ल्यःगु दुसाः माइक्रोसफ्ट विज्ञ एलन बैलोचन तुलाधरयात आमन्त्रित पार्षद् कथं ल्यःगु दु ।

Categorized in नेवाः