chetrapa55

नेपाः भारतलिसे बुत, प्रशिक्षक हरि खड्कां राजीनामा बिल

नेवा: अनलाइन न्युज | २०७६ मङ्सिर २३, सोमबार १६:११:५७

नेपाली राष्ट्रिय मिसा फुटबल टिमया प्रशिक्षक हरि खड्कां पदपाखें राजीनामा ब्यूगु दु ।

साग मिसा फुटबलया फाइनलय् भारतलिसे २–० गोल अन्तरं बुइधुंकाः प्रशिक्षक खड्कां राजीनामा बिइगु घोषणा याःगु खः ।

पोखराय् जूगु फाइनल कासा बुइधुंकाः नेपालं स्वक्वःगुखुसि रजतय् चित्त बुझेयायेमाःगु खः । कासा लिपा संचारकःमिलिसे खँ ल्हासे प्रशिक्षक खड्कां धाःगु दु, “गोल्डया टार्गेट कयाः वयागु खः । थ्व पूवंके मफुबलय् जिं नैतिकताया आधारय् मू प्रशिक्षकपाखें राजीनामा बियागु दु ।”

खड्काया प्रशिक्षणय् नेपालं साफ च्याम्पियनसिप फुटबलया फाइनलय् भारतलिसें बूगु खः । फाइनलय् नेपालं काःगु ह्वताःयात सदुपयोग यायेमफूगु तर भारतं काःगु निगुलिं ह्वताः गोल जूगु खड्कां न्यंकूगु दु ।

खड्कां धाःगु दु, “डिफेन्स व गोलकिपरदथुइ कम्युनिकेशन ग्याप जूगु हुनिं गोल जूगु खः । मेगु गोल नं झीगु हे कमजोरीं जुल ।”

फुक्क कासां नेपाःया स्ट्राइकिङ्ग जोनय् अझ नं सुधार यायेमाःगु खनेदूगु खड्कां न्यंकूगु दु ।

Categorized in कासा