telecom 18 kartik 2076

नेपाःया म्ह्याय् मचा बोनीता शर्मा विश्वया प्रेरणादायी मिसाया धलखय्

नेवा: अनलाइन न्युज | २०७६ आश्विन २९, बुधबार १५:३४:५९

नेपाःया म्ह्याय् मचा बोनीता शर्मा विश्वया प्रेरणादयक व प्रभावशाली १०० म्ह मिसाया धलखय् लायेत ताःलाःगु दु ।

बीबीसीं सन् २०१३ निसें दँय् दसं विश्वया थीथी क्षेत्रया प्रेरणादायक मिसाया धलः सार्वजनिक यानाः वयाच्वंगु दु । मिसाया अनुकरणीय ज्या विश्वन्यंकं थ्यंकेगु आज्जुया लिसें पिथनेगु यानाच्वंगु धलखय् श्रृंगार हलंज्वलं उद्यमी बाँबी ब्राउन, संयुक्त राष्ट्रसंघया ड्युटी सेक्रेटरी जनरल अमीना मोहम्मदलिसें सामाजिक कार्यकर्ता मलाला युसुफज लिसेलिसें लायेधुंकूगु दु । वंगु दँथें थुगु दँ नं बीबीसीं धलः सार्वजनिक याःगु दु, गुकी थीथी देसया मिसालिसें नेपाःया बोनीता शर्मा नं दुथ्याःगु दु ।

शर्मा सोसियल चेञ्ज मेकर एण्ड इनोभेटर्स संस्थाया संस्थापक ख: । शर्मा नेतृत्वया संस्थां मिसा सशक्तीकरणलिसें पोषण क्षेत्रय् ज्या यानाः वयाच्वंगु दु ।

बीबीसीं मिसा सशक्तीकरणलिसें पोषण क्षेत्रय् शर्मां याःगु योगदानया कदर यासें विश्वया १०० म्ह प्रभावशाली मिसाया धलखय् वय्कः मय्जुयात नं दुथ्याकुगु जानकारी ब्यूगु दु ।

बीबीसीया कथं, शर्मा अतिकं संघर्षया लिसें सामाजिक सेवाय् वःम्ह खः । मांया प्रेरणां डिग्री हासिल याःम्ह शर्मां मिसा शिक्षा व उकिया सशक्तीकरणया नितिं भूमिका म्हितूगु बीबीसीइ न्ह्यथनातःगु दु ।

मिसा शिक्षाया नितिं उकिया परियोजनां म्हितूगु भूमिकाया सम्मान यासें युनेस्को मलाला कोषं शर्माया संस्था पुरस्कृत तकं जूगु दु ।

शर्माया संस्थां ‘सोचाइ पोषणया नितिं युवा ज्याझ्वः’ लिसेंया अभियान न्ह्यःने हयाच्वंगु दु । कुपोषणं जुइगु बाल मृत्युदरलिसे ल्वायेत शर्मां न्युट्रबिड्स डिजाइन याःगु बीबीसीइ न्ह्यथनातःगु दु ।

अथेहे, थः मचातय्त गुकथं पोषणयुक्त नसा नकेफइ धकाः शर्मां ब्वलंकूगु जागरणयात नं बीबीसीं उदाहरणीय धाःगु दु ।

Categorized in अन्तर्राष्ट्रिय