ad 2076 5 18

नेतृ हिसिला यमि स्कुटर दुर्घटनाय् घाःपाः, बी एण्ड बी हस्पिटल भर्ना

नेवा: अनलाइन न्युज | २०७६ भाद्र २३, सोमबार १३:५२:४४

समाजवादी पार्टीया नेतृ हिसिला यमि स्कुटर दुर्घटनाय् लानाः घाःपाः जूगु दु । यलया ग्वार्कोय् मोटरसाइकलं ठक्कर नकेधुंकाः हिसिला यमि घाःपाः जूगु खः ।

हिसिलायात ग्वार्कों लिक्कच्वंगु बी एण्ड बी अस्पतालय् वासः याःगु दुसा वय्कःया अवस्था सामान्य जूगु समाजवादी पार्टीया प्रचार विभाग उपप्रमुख विश्वदीप पाण्डें जानकारी ब्यूगु दु । पाण्डें धाःगु दु, “अस्पतालया बेडय् नापलायेत वःपिन्त जि दुर्घटनाय् लाःगु खःला ? धकाः न्यनाच्वन । आः ला नर्मल अवस्थाय् वःगु दु । सायद थौं हे अस्पतालं डिस्चार्ज याइ जुइ ।”

म्हगलय् घाःया दाग खनेमदुसां नं छ्यनय् लिच्वः लाःगु चिकित्सकपिन्सं अनुमान याःगु दु । अय्सां हिसिला बुलुहुँ सामान्य अवस्थाय् वयेधुंकूगु पाण्डें धाःगु दु ।

नेतृ यमि पार्टी ज्याकुथिइ ग्वसाः ग्वःगु बैठकय् सहभागी जुइत वनाच्वंगु इलय् दुर्घटनाय् लाःगु खः । स्कुटर हिसिलाया ग्वाहालिमि छम्ह मिसां चलेयानाः वंगु खः ।

प्रहरीं ठक्कर नकूगु मोटरसाइकल चालकयात नियन्त्रणय् कयाः कारवाही प्रक्रिया न्ह्याकूगु दु ।

समाजवादी पार्टीया नायः डा. बाबुराम भट्टराईं नं थः जहान घाःपाः जूम्ह हिसिला यमिलिसेंया किपाः फेसबुकय् तयाः याकनं उसाँय् लनेमाः धकाः कामना तकं याःगु दु ।

Categorized in दुर्घटना-अपराध