ad 2076 5 18

नेकपाया बाणगंगा अध्यक्ष विश्व कार्कीयात ४५ लख ठगीया द्वपं

नेवा: अनलाइन न्युज | २०७६ भाद्र ३, मंगलबार १४:०१:२६

सरकारी जागिर नकाबिइ धकाः प्रलोभन क्यनाः सत्तारुढ नेपाल कम्युनिष्ट पार्टी (नेकपा)या नगर नायः नं लखौं तका दां असुल याःगु पीडितपिन्सं धाःगु दु ।

कपिलवस्तुया वाणगंगा नगरपालिकाया नगर नायः विश्व कार्कीं लोकसेवा आयोग पास याकाः बिइगु व नेपाल प्रहरीइ जागिर नकाबिइगु धासें थःपिनिगुपाखें ४५ लख ३० हजार तका दां काःगु धासें पीडितपिन्सं उजुरी ब्यूगु दु ।

इमिगु कथं बाणगंगा–२ छेँ दुम्ह विश्व कार्कीं शिक्षकया नितिं ४ लख ४० हजार, स्वास्थ्य सेवाया नितिं ३ लख व प्रहरी जवानया नितिं २ लख ६० हजार तका दांया दरं रकम असुल याःगु खः । रकम ब्यूसां नं नां पिहाँ मवःगु व तःक्वःमछि रकम माग याःसां लितमब्यूगु पीडितया दाबी दु ।

इमिसं नेकपा जिल्ला ज्याकुथिइ निवेदन बिसें रकम लित बिइकेत माग याःगु दु ।

नेकपा कपिलबस्तुया नायः झविलाल पोखरेलं मंगलवाः सुथय् उजुरी प्राप्त जूगु धासें निवेदकपिंलिसे सहलह यायेगु व कार्की दोषी खनेदुसा कारवाही जुइगु धाःगु दु ।

Categorized in दुर्घटना-अपराध