नेवा: अनलाइन न्युज – विजयरत्न | २०७६ आषाढ ८, आइतबार १३:३१:००

नेपाःया फिल्म निर्देशकपिनिगु मंकाः संगठन नेपाल चलचित्र निर्देशक समाजं म्हिगः शनिवाः न्ह्यलुवाः निर्देशक मोहन निरौला, तिर्थ थापायात अग्रज स्रष्टा सम्मान २०७६ लःल्हागु दु ।

अथेहेतुं उगु समाजं खुइदँ (६० दँ) पुलेधुंकूपिं निर्देशकपिनिगु सम्मान याये कथं आजिवन सदस्यता नं लःल्हागु खःसा उगु सदस्यता नेपाःया नांजाःम्ह ख्यालिजुजु मदनकृष्ण श्रेष्ठ व हरिवंश आचार्ययात धाःसा लःल्हागु मदु ।

शनिवाः जूगु अग्रज चलचित्र सर्जक सम्मान २०७६ व अन्तरक्रिया ज्याझ्वःया नामं ग्वसाः ग्वगु खःसां छु नं कथंया अन्तरक्रिया मजुगु खँयात कया नं आपासिनं कुंख्युंगु दु । 

मूपाहाँ संघीय मामिला तथा समान्य प्रशासनमन्त्री लालबाबु पण्डित, समाजया नायः सुचित्रा श्रेष्ठ, न्वकू व ज्याझ्वः कजि दिपक खाँडं मंकाः कथं निरौला व थापायात सम्मान पौ व खादां न्ययेकाः सम्मान याःगु खः ।

समाजया नायः सुचित्रा श्रेष्ठया सभानायःसुइ न्ह्याःगु उगु ज्याझ्वलय् नेपाल चलचित्र विकास बोर्डया नायः केशव भट्टराई, वोर्डया पुलांम्ह नायः राजकुमार राई, नेपाल चलचित्र  निर्माता  संघया नायः आकाश अधिकारी, नेपाल चलचित्र कलाकार संघया नायः रविन्द्र खड्का, नेपाल चलचित्र द्वन्द्व निर्देशक संघया नायः सूर्य ठोकर, नेपाल चलचित्र महिला गीतकार संघया नायः अस्मीता भण्डारी, नेपाल समुन्त महिला महासंघया नायः सोमा खत्रीपिन्सं थःथःगु नुगः खँ तयादीगु उगु ज्याझ्वलय् निर्देशक समाजया न्वकू दिपक खाँडं लसकुस न्वचू तयादीगु खः ।   

             

ज्याझ्वलय् चेतन कार्की, यादब खरेल, नीर शाह, लक्ष्मीनाथ शर्मा, विश्व बस्नेत, कृष्ण मल्ल, देशभक्त खनाल, प्रदिप उपाध्याय, किशोर राना मगर, रेशराज आचार्य, युवराज लामा लिसेंया १२ म्ह फिल्म निर्देशकपिन्त सम्मान कथं आजिवन सदस्यता लःल्हाःगु खःसा ख्यालिजुजु मदनकृष्ण श्रेष्ठ व  हरिवंश आचार्ययात धाःसा निर्देशक समाजं ल्वःमंकुगु द्वपं संकिपाकःमिपिन्सं ब्यूगु दु ।

ख्यालिजुजु मदनकृष्ण व हरिवंशं मंकाः कथं “फिलिम”नांयागु संकिपा निर्देशन याःगु खःसा हरिवंश आचार्यं एकति रुपं “जे भो राम्रै भो” निर्देशन यानादीगु खः ।

उगुहे ज्याझ्वलय् नेपाल चलचित्र कलाकार संघया न्हूगु ज्यासना पुचःया सकल दुजःपिन्त निर्देशक समाजपाखें भिन्तुना नं देछाःगु खः ।

Categorized in कला