chetrapa55

नाइस टेलिभिजनय् नं नेवाः ज्याझ्वः वइगु

नेवा: अनलाइन न्युज – ललेन्द्र शाक्य | २०७६ मङ्सिर १२, बिहिबार १३:२५:११

बौद्ध बिहार संघ यल व लायकु एफएम पुचःया ग्वसालय् नेवाः पत्रकार राष्ट्रिय दबू केन्द्रीय कमिटी व यल कचाःया न्हूगु ज्यासना पुचःयात भिन्तुना देछायेगु ज्याझ्वः जूगु दु ।

यलया पूच्वय् च्वंगु अक्षयश्वर महाविहारय् च्वंगु बौद्ध विहार संघया सभाकक्षय् जूगु उगु ज्याझ्वः संघया नायः नानीकाजी शाक्यया नायःसुइ न्ह्याःगु खःसा ज्याझ्वलय्  संघया निवर्तमान नायः पुष्परत्न शाक्य, वरिष्ठ उपाध्यक्ष करुणा बज्राचार्य, अक्षयश्वर महाविहार संघया नायः राजेश शाक्यपिन्सं भिन्तुना देछानादीगु खः ।

उगुहे ज्याझ्वलय् नाइस टेलिभिजनय् प्रसारण जुइत्यंगु नेवाः ज्याझ्वः  ‘झीगु सः’या घोषणा नं जूगु खः ।

‘झीगु सः’ ज्याझ्वःया कजि विजयरत्न असंबरें थ्व ज्याझ्वः ने सं ११४० थिंलाथ्व दशमी, मंसीर २० गते शुक्रवाः सनिलया ६ः३० ता इलय् प्रसारण जुइगु खँ कनादिल ।

बौद्ध विहार संघया ग्वसालय् जूगु उगु ज्याझ्वलय् नाइस टेलिभिजनया नायः आशीर्वाद पुन मगरं थःगु च्यानलं मेमेगु नेवाः ज्याझ्वः न्ह्याकायंकेगु खँ कनादिल ।

ज्याझ्वलय् पत्रकार दबूया केन्द्रीय महासचिव सुनिल महर्जन, दबूया यल कचाया न्वकू प्रशान्त माली व दबूया केन्द्रीय नायः सुरजबीर बज्राचार्यपिन्सं नं नुगःखँ तयादीगु खः । यल कचाःया दाँभरींलिसें लायकु एफएम पुचःया ल्यूछ्यान्जे सुनिल बज्राचार्यं न्ह्याकुगु उगु ज्याझ्वलय् ग्वसाःखलःपाखें मन्जु बज्राचार्यं सुभाय् न्वचू तयादीगु खः ।

Categorized in नेवाः