nepal life 2076 3 18

नगरपालिकाय् जागिर नकल निर्मला पन्तया मां दुर्गादेवीयात

नेवा: अनलाइन न्युज | २०७६ आषाढ २६, बिहिबार १३:३७:०१

स्कूलय् निर्मलाया स्मृति पार्क

दच्छि न्ह्यः बलात्कार लिपा हत्या जूम्ह १३ दँया निर्मला पन्तया मां दुर्गादेवीयात भीमदत्त नगरपालिकाय् जागिर नकूगु दु । दुर्गादेवीयात दैनिक हाजिरीइ ज्या याकेगु कथं नगरपालिकां नियुक्त याःगु खः ।

भाःतम्ह मेम्ह कलाःलिसे पिने हे च्वनाच्वंगु व छेँ परिवार चलेयायेत थाकूगु धासें दुर्गादेवीं जागिरया नितिं निवेदन बिइधुंकाः मानवीय ल्याखं नियम कानून दुने च्वनाः ‘डोर हाजिरी’इ नियुक्ति ब्यूगु भीमदत्त नगरपालिकाया मेयर सुरेन्द्र विष्टं धाःगु दु । दुर्गादेवीं प्यला न्याला न्ह्यःनिसें हे जागिरया नितिं थःत आग्रह याःगु व ताःईया सहलह लिपा नियुक्ति बियागु मेयर विष्टं धाःगु दु ।

मेयर विष्टं धाःगु दु, “म्ह्याय् निर्मलाया बलात्कार धुंकाः हत्या जुल । भाःतम्हं स्वइमखु धायेधुंकाः मानवीय ल्याखं नं नगरपालिकां वय्कःया नितिं ग्वाहालि यायेमाःगु हे जुल । जिमिसं वय्कःया निवेदन कथं न्हिथं हाजिरीइ ज्याकुथिइ ग्वाहालि यायेगु धकाः ज्या बियागु दु । वय्कःया योग्यताया हुनिं नं ज्याकुथि ग्वाहालिमिया जागिर बिइमाःगु खः तर जिमिसं ज्याकुथि ग्वाहालिमि धयागु मदु ।”

निर्मलाया नितिं न्याय फ्वनेगु आन्दोलनय् प्रहरीया गोलीपाखें सीम्ह सन्नी खुनाया मां मञ्जुयात थ्वसिबें न्ह्यः हे वहे प्रकृतिया जागिर नगरपालिकां बिइधुनागु मेयर विष्टं धाःगु दु । वं निर्मला व सन्नी खुना निम्हेसिगु छेँजःयात नगरपालिकाया पाखें थ्वसिबें न्ह्यः हे ३–३ लख तका दां राहत उपलब्ध याकागु तकं जानकारी ब्यूगु दु ।

स्कूलय् निर्मलाया स्मृति पार्क

थ्वहे झ्वलय् भीमदत्त नगरपालिकां निर्मला पन्तया लुमन्ति सदां दयाच्वनेमा धकाः निर्मला पन्त ब्वनीगु स्कूलय् निर्मला स्मृति पार्क निर्माण याइगु जूगु दु ।

नगरपालिकां वडा ल्याः २ या उल्टाखामय् च्वंगु सरस्वती मावि परिसरय् थ्यंमथ्यं ७ लखया लगानीइ स्मृति पार्क निर्माण यायेत्यंगु मेयर विष्टं धाःगु दु ।

नगरपालिकां निर्मला पन्त हत्या लिपा मिसापिनिगु सुरक्षाया नितिं स्कूलनिसें विश्वविद्यालयतकया छात्रापिन्त सेल्फ डिफेन्स तालिम बिइगु न्ह्याकूगु दु । मेयर विष्टया कथं न्हापांगु चरयणय् प्रत्येक सामुदायिक विद्यालयया न्याम्ह विद्यार्थी छात्रापिन्त तालिम बियाः प्रशिक्षकया रुपं खटेयाःगु दु ।

Categorized in स्थानिय-समाज