nepal lifef 2076 8 8

धादिङ बस दुर्घटना : न्यान्हु दत बेपत्ता जूपिं मलूनि

नेवा: अनलाइन न्युज | २०७६ श्रावण २८, मंगलबार १५:५६:५७

पृथ्वी राजमार्गया बेनीघाट रोराङ गाउँपालिका–३ सलाङघाटय् जूगु बस दुर्घटनाय् लानाः बेपत्ता यात्रुपिं मालेगु नितिं जिल्ला प्रशासन ज्याकुथि धादिङं जलाखला प्यंगू जिल्लायाके आग्रह याःगु दु ।

बस दुर्घटनाया न्यान्हु तक नं बेपत्ता यात्रु लुयाः मवयेधुंकाः प्रशारनं मेगु प्यंगू जिल्लायाके ग्वाहालि फ्वंगु खः ।

सर्लाहीया मलंगवां येँय् वयाच्वंगु ना६ख ७४६९ ल्याःया बस शुक्रवाः दुर्घटना जूगु खः । दुर्घटनाय् आःतक ११ म्ह यात्रुपिं सीधुंकूगु दुसा मेपिं १९ म्ह यात्रुपिं बेपत्ता जुयाच्वंगु अनुमान याःगु दु ।

धादिङया प्रमुख जिल्ला अधिकारी भगीरथ पाण्डें बेपत्ता जूपिनिगु मालेगु नितिं जिल्ला प्रशासन ज्याकुथि गोरखा, चितवन, पूर्वी नवलपरासी व तनहुँयाके इनाप याःगु दु ।

बेपत्तापिं मालेत आग्रह यायेधुंकाः फुक्क जिल्लाया प्रहरी खुसि सिथय् मालेगु नितिं थ्यंकूगु पाण्डें धाःगु दु ।

वा वःगु इलय् तच्वकं खुसिबाः वःगुलिं उद्धार व मालेगु ज्याय् पंगः जूसां नं सुरक्षा निकाय निरन्तर सक्रियताया लिसें ज्या यानाच्वंगु जिल्ला प्रहरी ज्याकुथि धादिङया प्रमुख प्रहरी उपरीक्षक राजकुमार वैदवारं धाःगु दु ।

मालेगु ज्याया नितिं न्यासि जुया जक सम्भव मजूगुलिं त्रिशूली खुसि सिथय् दूगु ६ गू रिसोर्टयात तकं सतकृ जुइत व मालेगु ज्याय् ग्वाहालि यायेत जिल्ला प्रशासन ज्याकुथि धादिङं आग्रह याःगु दु ।

Categorized in दुर्घटना-अपराध