swastha 3

धर्मकीर्ति विहारयात ज्योति कंसाकार छेँजःपाखें भवन दान

नेवा: अनलाइन न्युज – ललेन्द्र शाक्य | २०७६ श्रावण २७, सोमबार १४:०३:२७

धर्मकीर्ति विहारयात ज्योति कंसाकार छेँजःपाखें भवन दान याःगु दु ।

थौं नेपाल संबत् ११३९ गुँलाथ्व द्वादशि सोमवाःकुन्हु छगू ज्याझ्वःया दथुइ पद्मज्योति कंसाकार, रुपज्योति कंसाकार व सकल ज्योति कंसाकार छेँजःपिसं धर्मकीर्ति विहार संरक्षण कोषया नितिं कोषया नायः व विहार प्रमुख श्रद्धेय धम्मावती गुरुमांयात ५ आना जग्गा व उगु जग्गाय् दनातःगु छेँया लालपूर्जा लःल्हासें विहारया नितिं भवन दान याःगु खः।

थ्यंमथ्यं ४० दँ न्ह्यः साहु मणिहर्ष ज्योति कंसाकारं येँ महानगरपालिका वडा ल्याः २५ श्रीघः त्वालय्, आः दुगु धर्मकीर्ति विहारया उत्तर पश्चिमपाखे ५ आना जग्गा न्याना उगु थासय् माःकथं इलय् ब्यलय् छेँ दयेकाः धर्मकीर्ति विहारया गुरुमांपिन्त धर्म ज्याया नितिं लःल्हानातःगु खः। उगु हे जग्गा व भवन वैधानिक रुपं धर्मकीर्ति विहार संरक्षण कोषया नामय् नामसारी यायेधुंकाः थौं लालपुर्जा लःल्हाःगु खः।

धर्मकीर्ति विहार संरक्षण कोषया छ्याञ्जे प्रफुल्ल कमल ताम्राकारं न्ह्याकादीगु उगु ज्याझ्वलय् मदुम्ह मणिहर्ष ज्योति व वयकःया जहान केशरी लक्ष्मीया किपातय् वयकःपिनि कायपिं पद्मज्योति व डा. रुपज्योतिं स्वांमाः क्वखायेकुसे देवा च्याकाः श्रद्धा द्यःछानादीगु खः।

अथेहे वयकःपिसं थः बाज्या भाजु रत्न, अबु मणिहर्ष ज्योति व मां केशरी लक्ष्मीपिसं क्यनादीगु लँपुइ वनाः नेपालय् बुद्धधर्म च्वन्ह्याकेगु ज्याय् छुं भच्चा ग्वाहालि यानाच्वनागु खँ न्ह्यथनादिसें धर्मकीर्ति विहारयात भवन लःल्हायेगु ज्या गजू छुइगु थें जक जूसां लसताया ज्या जूसां थःपिं लयताः धयादिल।

ज्याझ्वलय् उपस्थित जुयाःबिज्याःम्ह श्रद्धेय कोन्डण्य भन्ते नं साहु भाजु रत्न, साहु मणिहर्ष ज्योति, साहुनि केशरी लक्ष्मीपिसं नेपालय् बुद्ध शिक्षा च्वन्ह्याकेगु ज्याय् यानादीगु योगदानया प्रसंसा यानादिसें जग तयेगु थेंहे गजू छुइगु नं उतिकं महत्वपूर्ण जूगुलिं ज्योति छेँजःपाखें याःगु थुगु धर्मया ज्या तसकं च्वछायेबहःजू धकाः धयाः बिज्यात।

भवनया लालपूर्जा लःल्हाना कायेधुंकाः श्रद्धेय धम्मावती गुरुमां नं थः बुद्ध शिक्षा अध्ययन यायेत बर्मा वनेगु झ्वलय् निसें साहु मणिहर्ष ज्योति, साहुनि केशरी लक्ष्मी व ज्योति छेँजःनाप बाँलाःगु स्वापू दुगु व उगु इलंनिसें आपालं ग्वाहालि दुगु व अध्ययन लिपा नेपाः लिहाँ वयेधुंकाः धर्मकीर्ति विहार दयेके न्ह्यो वयकःपिनिगु केलत्वाः तःखा छेँय् च्वंगु छेँय् च्वनागु लुमंकाः बिज्यात। वयकःपिनिगु हे सल्लाह कथं श्रीघलय् धर्मकीर्ति विहार पलिस्था यानागु व आःतक नं ज्योति छेँजःपाखें ग्वाहालि दयांतुं च्वंगु खँ नं वसपोल गुरुमां धम्मावतीं कनाः बिज्यात।

बुद्ध, धर्म व संघप्रति तःधंगु श्रद्धा तयाः धर्मकीर्ति विहारयात भवन दान यानादीगुलिं ज्योति छेँजःया उन्नती प्रगतिया कामना यासें साधुवाद आशिर्वाद द्यःछानाः बिज्यात।

पुर्खाया लँपु नालाः बुद्ध शासनया संरक्षण यायेया नितिं भवन दान यानाः पुण्यया ज्या यानादीपिं साहु पद्मज्योति, साहु डा. रुपज्योति लगायत सकल ज्योति कंसाकार छेँजःप्रति धर्मकीर्तिपाखें आपालं साधुवाद द्यःछाना च्वना धकाः ज्याझ्वलय् धाःगु खः।

Categorized in नेवाः