धम्म–मुदित अभिनन्दन ज्याझ्वः जुइगु
नेवा: अनलाइन न्युज – ललेन्द्र शाक्य | २०७६ श्रावण २०, सोमबार ११:४२:३५
अखिल नेपाल भिक्षु महासंघया न्ह्यलुवाय् संघनायक अभिनन्दन समारोह समिति २०७६ या संयोजनय् धम्म–मुदिता अभिनन्दन ज्याझ्वः जुइगु जूगु दु ।
अखिल नेपाल भिक्षु महासंघया महासचिव भिक्षु कोण्डन्यं बियाः बिज्याःगु जानकारी कथं उगु ज्याझ्वः थ्वहे वइगु श्रावण २५ गते शनिवाः येँया कमलादीया नेपाल प्रज्ञा प्रतिष्ठानय् न्हिनसिया १ः३० ता इलय् न्ह्याइगु जूगु दु ।
अखिल नेपाल भिक्षु महासंघपाखें वंगु २०७६ बैशाख १ गते आइतवाःया दिं संघनायक पतिठ्ठानविधि लिसें संघसम्मत विधिपूर्वक संघनायक पदवीं विभूषित नेपाःया ७ औं अति पूजनीय संघनायक, अखिल नेपाल भिक्षु महासंघया संरक्षक अग्गमहापण्डित सासनधज धम्माचरिय भिक्षु ज्ञानपूर्णिक महास्थविरया बुद्धशासनिक योगदान लुमंकाः अखिल नेपाल भिक्षु महासंघया न्ह्यलुवाय् व सम्बद्ध विहार व संघसंस्थापिनिगु सहभागिताय् थुगु धम्म–मुदिता अभिनन्दन ज्याझ्वःया ग्वसाः जूगु भिक्षु कोण्डन्यं जानकारी बियाः बिज्याःगु दु ।
उगु ज्याझ्वलय् उपराष्ट्रपति नन्दकिशोर पुन मूपाहाँ कथं झाइगु जूगु दुसा ग्वसाः खलः अखिल नेपाल भिक्षु महासंघ, संघनायक अभिनन्दन समारोह समिति २०७६ या संयोजक भिक्षु कोण्डन्यं सकलसित उगु ज्याझ्वलय् सहभागी जुयाः श्रद्धाभाव अभिव्यक्त यायेत मैत्रीपूर्ण आमन्त्रण यानाः बिज्याःगु दु ।
Categorized in राष्ट्रिय