telecom 18 kartik 2076

दक्षिण भारतय् खुसिबाः व चलखं सच्छिम्हं मल्याक मनूत सित

नेवा: अनलाइन न्युज | २०७६ श्रावण २६, आइतबार ११:५८:०८

मनसुनी वा वयेधुंकाः वःगु खुसिबाः, चलः व डुबानया हुनिं भारतय् स्वन्हुया दुने कम्ती नं १०० म्ह मनूत सीगु दुसा लखौं नागरिक विस्थापित जूगु दु ।

खुसिबालं भारतया दक्षिणी राज्य केरलाय् दकले अप्वः लिच्वः लाकूगु दु । अन बिहिवाःनिसें शनिवाःतकया दुने जक ४८ म्ह मनूत सीधुंकूगु दु ।

केरलाया जलाखला कर्नाटक राज्य नं वःगु वापाखें व खुसिबाःपाखें लिच्वः लाःगु खः । भारतीय संचारमाध्यमतसें जानकारी ब्यूकथं अनया थ्यंमथ्यं २४ म्ह मनुत खुसिबाः व चलखय् लानाः सीगु खःसा ९ म्ह मनूत तनाच्वंगु दु ।

भारतया पश्चिमी राज्य महाराष्ट्र व गुजरात नं वार्षिक मनसुनी आँधीया हुनिं बांमलाक्क लिच्वः लाःगु दु । कर्नाटकय् थीथी ६०० गू राहत केन्द्रय् करिब १ लख ६१ हजार मनूत विस्थापित जुयाः आश्रय कयाच्वंगु दु ।

भारतीय संचारमाध्यमतसें जानकारी ब्यूकथं महाराष्ट्रय् नं २७ म्हेस्या वा, खुसिबाः व डुबानया हुनिं ज्यान गुमेयाःगु दु । अथेहे, गुजरातया अहमेदावाद व नादिआवादय् नं वर्षाजन्य घटनाया हुनिं ८ म्ह मनूत सीगु दु ।

दकले अप्वः लिच्वः लाःगु केरला राज्यय् थ्यंमथ्यं १ लख २० हजार मनूत विस्थापित जूगु दु । इमिसं आः आपतकालीन राहत केन्द्रय् आश्रय कयाच्वंगु दु । भारतीय संचारमाध्यमतसें जानकारी ब्यूकथं केरलाया थ्यंमथ्यं ८० गू थासय् वा वयेधुंकाः खुसिबाः व चलः वंसां नं प्रहरी थ्यंकेफूगु मदुनि ।

केरलाय् शनिवाः लिपा नं वा वइगु व अनया जनजीवनय् थप लिच्वः लाइगु अनुमान याःगु दु ।

ग्रामीण वस्तीतय्के सैनिकया थीथी पुचःतसें उद्धार इकाइ दयेकाः उद्धारय् वनेत व विस्थापित नागरिकपिन्त खाद्यान्न व अत्यावश्यक सामग्री वितरण यायेत माःगु हेलिकोप्टरया नं परिचालन यायेत सरकारं निर्देशन ब्यूगु दु ।

खुसिबाः व चलःया हुनिं आपालं नागिरिक लिच्वः लायेधुंकाः प्रधानमन्त्री नरेन्द्र मोदीं उगु क्षेत्रय् राहत व उद्धारया म्हो मयायेत सरकारी अधिकारीपिन्त निर्देशन ब्यूगु दु ।

केरला खुसिबाः चलःया जोखिमय् लाःगु क्षेत्र खः । अन वंगु दँ खुसिबाः वयाः कम्ती नं ५०० म्ह मनूत सीगु खः ।

Categorized in अन्तर्राष्ट्रिय