थौं विश्वव्यापी एस्पेरान्तो दिं, नेवाः भासं नं पोष्टर
नेवा: अनलाइन न्युज – निश्चल | २०७२ श्रावण १०, आइतबार ०९:०९:५८
थौं जुलाई २६यात विश्वभरया मातृभाषाप्रेमीपिन्सं एस्पेरान्तो दिंया कथं हनाच्वंगु दु ।
थुकुन्हु सन् १८८७ य् डा. लाजारो लुदोभिक जामेनहोफं दकलय् न्हापां एस्पेरान्तो भायया परिचय सहित थ्व भाय् सयेकेगु न्हापांगु सफू पिकाःगु खः ।
सन् १९९६य् जूगु संयुक्त राष्ट्र व युनेस्कोया अधिकारीत च्वनाः याःगु प्राग घोषणा पत्रय् एस्पेरान्तो भाय्या मुख्य लँपु प्रजातन्त्र, रुपान्तरण शिक्षा, शिक्षण प्रभावकारिता, बहुभाषावाद, भाषिक अधिकार, भाषिक विविधता व मानव स्वतन्त्रतायात काःगु दु ।
थौं फ्रान्सया लिल धइगु थासय् १००कःगु विश्व एस्पेरान्तो महाधिवेशन जुल । थ्व ज्याझ्वलय् थीथी देसं थ्यं मथ्यं निद्वः मनूत एस्पेरान्तो भासं थ्व भाय्या विविध पक्षयात कयाः सहलह यानाच्वंगु दु ।
थ्व दिनय् संसारय्या फयांफक्व भासं “भाषिक न्याय” धइगु नारा सहित छगू हे कथंया पोस्टर प्रकाशित यानाः प्रचार प्रसार यायेगु ज्या जुइ । थ्व हे झ्वलय् नेवाः भासं नं पोस्टर तयार जूगु दु ।
