nepal life 2076 3 18

थौं रोजी डंगोल श्रेष्ठया याकः सांगितिक सनिल ‘सूर–साधना’ जुइगु

नेवा: अनलाइन न्युज – ललेन्द्र शाक्य | २०७६ आषाढ २६, बिहिबार १५:५०:२४

फ्री इन्ट्रान्स, राष्ट्रिय नाचघरय् न्हिनसिया ३ ता इलय्

नेपालभाषा संगीत ख्यलय् बुलुहुँ नां जायाः वयाच्वंम्ह संगीतकःमि म्येहालामि रोजी डंगोल श्रेष्ठया याकः सांगितिक सनिल थौं बिहिवाः न्हिनसिया ३ ता इलंनिसें येँया जमलय् च्वंगु राष्ट्रिय नाचघरया हलय् जुइत्यंगु दु ।

सांस्कृतिक संस्थान राष्ट्रिय नाचघरया ग्वसालय् प्रत्येक महिनाया लिपांगु बिहिवाः पतिं ‘सूर–साधना’ नां बियाः न्ह्यानाः वयाच्वंगु थुगु सांगितिक ज्याझ्वलय् असार महिनाया दकले लिपांगु बिहिवाः रोजी डंगोल श्रेष्ठया पाः लाःगु खः । थौं बिहिवाः जुइगु रोजी डंगोल श्रेष्ठया प्रस्तुति ग्वसाः खलःया झिंनिक्वःगु श्रृंखला खः ।

म्येहालामि संगीतकःमि रोजीं नेवाः अनलाईनन्यूजयात बियादीगु जानकारी कथं वय्कलं थौं बिहिवाः जुइगु याकः सांगितिक सनिलय् थ्यंमथ्यं छगू दर्जनति म्ये हालाः न्यंकादीगु जूगु दु ।

उगु सांगितिक सनिलय् म्येहालामि रोजीं नेपालभाषा संगीतयात हे अप्वः प्राथमिकता ब्यूगु खनेदु । थौं वय्कलं खस नेपाली भाषाया म्येसिबें नेपालभाषा म्ये अप्वः हालाः न्यंकादी ।

वय्कलं धयादी, “जि नेवाः खः, जिगु मांभाय् नेपालभाषा खः । उकिं जिं थःगु मांभाय् अले मां भाषाया संगीतयात अप्वः प्राथमिकता बियागु खः ।”

म्येहालामि रोजी डंगोल श्रेष्ठं सकल संगीतह्यःमिपिन्सं थौंया वय्कःया याकः सांगितिक सनिलय् ब्वति कयादी धैगु भलसा कासें वय्कःयात हःपाः तिबः बिइगु नितिं राष्ट्रिय नाचघरय् सकल संगीतह्यःमिपिं झाइ धकाः विश्वास नं प्वंकादीगु दु ।

रोजीया ‘मस्यू जितः छु जु छु जु...’ बोलया नेपालभाषाया म्ये थौंकन्हय् अतिकं लोकं ह्वानाच्वंगु दु ।

रोजी डंगोल श्रेष्ठं ‘यच्चुगु सर्गः’ नांया याकः म्येचाः नं पिथनादी धुंकूगु दुसा वय्कःया आपालं नेपालभाषा व खस नेपाली भाषाया म्येत आः रिकर्ड जुयाच्वंगु दुसा वय्कःया म्येत यूट्युबय् नं स्वयादी फइ ।

थौं वय्कः रोजी डंगोल श्रेष्ठया याकः सांगितिक सनिल ‘सूर–साधना’ स्वयेत व न्यनेत टिकट न्यायेमाःगु कष्ट यायेम्वाःगु व फ्रि इन्ट्रान्स धकाः धासें रोजी डंगोलं थःगु ज्याझ्वलय् उपस्थितिया नितिं हाकनं छक्वः सकलसित इनाप यानादीगु दु ।

Categorized in कला