chetrapa55

थौं बुधवाःनिसें ए डिभिजन लिगय् स्वंगूगु चरणया कासा जुइगु

नेवा: अनलाइन न्युज | २०७६ पौष ९, बुधबार १२:१४:३७

च्यासल युथ क्लबया सन्तोष साहुखलः नं गोल यातकि ए डिभिजन लिगय् १०० गोल याःम्ह न्हापांम्ह कासामिया रेकर्ड तइगु

शहीद स्मार ए डिभिजन लिगअन्तर्गत थौं बुधवाःनिसें स्वंगूगु चरणया कासा जुइगु जूगु दु ।

ग्वसाः खलः अखिल नेपाल फुटबल संघ एन्फां सार्वजनिक याःगु धलः कथं थौं बुधवाm निगू कासा जुइ ।

आः न्हिनय् १२ ता ईनिसें न्हापांगु कासा मच्छिन्द्र क्लब व फ्रेण्ड्स क्लब दथुइ न्ह्याःगु दुसा ३ ता इलय् च्यासल क्लब व एनआटी दथुइ कासा जुइ ।

थौं सुं छम्ह कासामिं गोल याःसा व नेपाःया लिगलिसें कासामिया नितिं विशेष दिं जुइ । उम्ह कासामि खः सन्तोष साहुखलः । वं च्यासल युथ क्लबपाखें लिग म्हिताच्वंगु दु । उगु कासाय् सन्तोषं १ गोल याःसा व ए डिभिजन लिगय् १०० गोल याःम्ह न्हापांम्ह कासामि जुइत ताःलाइ । सन्तोषं थुगु सिजन ३ गोल यासें लिगय् गोल ल्याः ९९ थ्यंकूगु खः ।

सन्तोषया कप्तानयि दूगु च्यासल क्लब. थुगु सिजनय् बांलाःगु सुरवात याःगु दु । न्हापांगु कासाय् हे वंगु सिजनया उपविजेता संकटा क्लबयात २–० गोलअन्तरं बुकूम्ह च्यासल निगूगु कासाय् मच्छिन्द्र क्लबलिसे १–१ या बराबरीइ लाःगु खः । निगुलिं कासाय् च्यासलया नितिं सन्तोष साउखलः नं हे गोल याःगु खः । स्वंगूगु कासाय् नं सन्तोषं उगु लययात निरन्तरता ब्यूसा व न्हूगु कीर्तिमान जुइत ताःलाइ ।

थुगु सिजनय् स्टार कासामि दुथ्याकूगु मच्छिन्द्र क्लबं न्हापांगु कासाय् ब्रिगेड ब्वाइजयात २–० गोलअन्तरं बुकूगु खःसा निगूगु कासाय् च्यालसलिसे बराबरी म्हितूगु खः । उखे फ्रेण्ड्स थुगु सिजनय् जितविहीन जूगु दु । न्हापांगु कासाय् आर्मीलिसे २–१ गोलअन्तरं बूगु फ्रेण्ड्स निगूगु कासाय् ब्रिगेडलिसे २–० गोलअन्तरं बूगु खः ।

Categorized in कासा