jivan sahara nepal life

थौं च्यागूगु चरणया ए डिभिजन लिग : मच्छिन्द्र व पुलिस भिडन्त

नेवा: अनलाइन न्युज | २०७६ माघ ८, बुधबार १२:०६:२९

सहीद स्मारक ए डिभिजन लिगय् थौं बुधवाःनिसें च्यागूगु चरणया कासा जुइगु जूगु दु । चरणया न्हापांगु कासा अन्तर्गत थौं मच्छिन्द्र क्लब व पुलिस क्लब दथुय धेंधेंबल्ला जुइगु जूगु दु ।

थुगुखुसि सहीद स्मारक ए डिभिजन लिगया विशेषता खः, अकं तालिकाय् रोमाञ्चकता । शीर्ष ६ गू टोलीदथुइ ५ अकंया जक फरक दुसा निगूगु निसें खुगूगु तक दइगु टोलीदथुइ मुक्कं २ अंकया अन्तर दु । उकिं, छगू जित व हारं नं अंक तालिकाय् आपालं च्वय् क्वय् जुइ ।

वहे शीर्षताया होडय् दूगु मच्छिन्द्र क्लब व नेपाल पुलिस क्लबदथुइ थौं बुधवाः च्यागूगु चरणया न्हापांगु कासाय् भिडन्त जुइत्यंगु दु ।

कासा दशरथ रंगशालाय् थौं बुधवाः न्हिनय् ३ बजे जुइ । ७ गू कासापाखें १३ अंकलिसें मच्छिन्द्र निगूगु थासय् दुसा समान कासापाखें ११ अंकिलिसें पुलिस खुगूगु थासय् दु ।

मच्छिन्द्र क्लबं जित थःगु ल्हातय् लाकूसा लिड लिडर आर्मीलिसे बराबरी याइ । पुलिस विजयी जूसा १४ अंक मुंकाः मच्छिन्द्रयात हे ल्यूने लाकाः निगूगु थासय् थाहां वइ ।

तर मनाङविरुद्धया कासाय् मैदानय् हे मुक्कामुक्की समावेश जूपिं स्वम्ह कासामि निगू कासाया निलम्बन लिपा पुलिसविरुद्धया हे कासापाखें पुनरागमन यायेत्यंगु दु । थुकें मच्छिन्द्र क्लबयात उत्साहित याःगु दु ।

डिफेण्डर देवेन्द्र तामाङ व विजय धपमाललिसें फरवार्ड दिवक राई निगू कासाया निलम्बन क्वचायेकाः मैदान लिहाँ वयेत्यंगु दु ।

स्वम्ह कासामि मदुबलय् दाबेदार मच्छिन्द्र क्लबया प्लेईङ्ग सेट व बेञ्चतकं कमजोर जूगु खः ।

Categorized in कासा