nepal lifef 2076 8 8

थौं किपुली जुइगु ज्याझ्वलय् ख्यालिजुजु झी मदनकृष्ण मूपाँहा

नेवा: अनलाइन न्युज – ललेन्द्र शाक्य | २०७६ भाद्र ६, शुक्रबार १२:५६:२०

ज्येष्ठ नागरिकपिं लिसें ७ म्ह थीथी विधाया व्यक्तित्वपिन्त हनीगु, न्ह्याइपुगु सांगितिक साँझ ११३९ जुइगु

किपूया ३ वडा कुतिसा त्वाःया मदुम्ह नांजाःम्ह उस्ताद गोविन्द किपूया नामं पलिस्था यानातःगु उस्ताद गोविन्द किपू फाउण्डेशनया ग्वसालय् न्याचुरल हर्बलको विशेष ग्वाहालिइ न्याक्वःगु संस्करण कथं ज्येष्ठ नागरिक सम्मान व सांगितिक साँझ ज्याझ्वः जुइगु तयारी जुयाच्वंगु दु ।

थौंया ज्येष्ठ नागरिक सम्मान व सांगितिक साँझ ज्याझ्वलय् ख्यालिजुजु झी मदनकृष्ण श्रेष्ठ मूपाहाँ कथं झाइगु जूगु दुसा वय्कःया ल्हाःतं ज्येष्ठ नागरिकपिं सम्मानित जुइसा वय्कलं न्ह्याइपुगु सांगितिक ख्यालःया सवाः नं न्ह्यब्वइगु जूगु दु ।

अथेहे, ज्याझ्वलय् ३ नम्बर प्रदेशया सांसद पुकार महर्जन, किपू नगरपालिकाया मेयर रमेश महर्जनलिसें अनक मिडिया प्रा.लि.या प्रमुख श्रीराम महर्जनपिं विशेष पाहाँया रुपं उपस्थित जुयादीसा पाहाँया रुपं नेकपा केन्द्रीय दुजः सुरेन्द्र मानन्धर, किपू नगरपालिका ३ वडाया वडाध्यक्ष राजेन्द्र महर्जन, २ वडाया वडाध्यक्ष लिसें किपू नगरपालिकाया संस्कृति सम्पदा पर्यटन विभाग प्रमुख रमेशमान डंगोल, किपु ३ वडा दुजः ज्ञानप्रसाद महर्जन, किपूया प्रहरी प्रमुख डिएसपी छेदीलाल कामती, समाजसेवीपिं राजेन्द्र मानन्धर व बुद्धरत्न महर्जनलिसें लोककवि राजभाई जकःमिपिं उपस्थिति जुइगु जानकारी ग्वसाः खलः उस्ताद गोविन्द किपू फाउण्डेशनया नायः दिलीप किपू नं नेवाः अनलाइनन्यूजयात बियादीगु दु ।

ज्येष्ठ नागरिक सम्मान धुंकाः ७ म्ह थीथी ख्यःया व्यक्तित्वपिन्त हनीगु ज्याझ्वः तयातःगु दु । सुल्तान अफ स्ट्रीङ्ग बरिष्ठ गितारवादक अनिल शाही, किपूया पुलांम्ह म्येहालामिलिसें उस्ताद गोविन्द किपूया शिप्य राजु जः, किपूया सक्रिय पत्रकार श्रीकृष्ण महर्जन, यलया परम्परागत बाजाया बाद्यगुर हरिलाल श्रेष्ठ, ईमेज च्यानल समेबजिया प्रमुख सुरेन्द्र मानन्धर, तितो सत्य टेलिसिरियलया चम्सुरी किपूया बरिष्ठ कलाकार पल्पसा डंगोल व बांलाःम्ह बाँसुरीबादक विनय महर्जनपिन्त सम्मान याइगु ज्याझ्वः तयातःगु दु ।

सम्मान ज्याझ्वः क्वचायेकाः निगूगु ब्वकथं सांगितिक साँझ जुइगु जानकारी बिसें ग्वसाः खलः फाउण्डेशनया नायः दिलीप किपू नं अनिल शाही, ज्ञानेश्वर निभाः, राजेश महर्जन नेवाः, राजु जः, लक्ष्मी रिसाल, अटुल मानन्धर, कृष्णकमल श्रेष्ठ, निर्मल सिंह, प्रवेश महर्जन, विनय महर्जन, पल्पसा डंगोल चम्सुरी, सुरेन्द्र मानन्धरपिनिगु इमेज च्यानल समेबजि पुचःया हास्य प्रस्तुति जुइगु जानकारी बियादीगु दु ।

अथेहे, ज्याझ्वलय् न्हूप्रतिभा किपूया नवोदित गायक कलाकार भुवन महर्जनया सांगितिक ब्वज्या नं जुइगु जानकारी बिसें उगु ज्याझ्वलय् थीथी हुलाप्याखं न्ह्यब्वयेगु जानकारी नं भाजु किपू नं बियादीगु दु ।

ज्याझ्वलय् लोककवि राजभाई जकःमिं मदुम्ह उस्ताद गोविन्द किपूया विषयस चिनाखँ ब्वनाः न्यकीगु ज्याझ्वः तयातःगु दुसा वय्कलं हे च्वयादीगु ज्येष्ठ नागरिक सम्बन्धी म्ये नांजाःम्ह म्येहालामि रीता महर्जनं न्ह्यब्वइगु ज्याझ्वः नं दु ।

अथेहे, ज्याझ्वलय् नेपालभाषाया कवि नरेनमान लिसें न्हूप्रतिभा चिनाखँ च्वमि सलिना महर्जनपिन्सं नं कविता न्यंकादीगु ज्याझ्वः तयातःगु दु ।

ग्वसाः खलकं ब्यूगु जानकारी कथं ज्याझ्वः थौं कृष्णजन्मास्तमिया दिं सनिलया ४ ता इलय् न्ह्याइगु जूगु दुसा ज्याझ्वः किपू नगरपालिका ३ वडाया कुतिसा त्वालय् जुइगु जूगु दु ।

नेवाः एफएमया संचालिका सरीना बज्राचार्य व ललेन्द्र शाक्यं न्ह्याकीगु उगु ज्याझ्वः सुथां लाकेगु नितिं कुतिसा त्वाःया युवा म्ये खलः, नीलः पुचःलिसें कुतिसा त्वाः सकल परिवारपाखें विशेष रुपं ग्वाहालि याःगु दु धकाः फाउण्डेशनया नायः दिलीप किपू नं जानकारी बियादीगु दु ।

Categorized in कला