थौं असार ४ गते माइतीघर मण्डलाय् मुनेगु दिं
नेवा: अनलाइन न्युज – ललेन्द्र शाक्य | २०७६ आषाढ ४, बुधबार ०९:३४:२८
“गुथि विधेयक क्यनेथें लितकाःगु घोषणा जक याःगु खः, खारेज हे याःगु मखु । थ्व सरकारं गुगु नं इलय् थ्व गुथि विधेयकयात हाकनं लागू यायेगु कसरत याइ हे तिनि । उकिं झी सकल सचेत जुयाः च्वने हे माः, आन्दोलन निरन्तर रुपं न्ह्याकाः तुं च्वनेमाः ।”
थौं असार ४ गते बुधवाः, येँया माइतीघर मण्डलाय् मुनेगु दिं खः । थौं सुथय् ११ ता इलय् अन सरकारं संसदय् दर्ता याःगु गुथि विधेयकविरुद्ध विशाल जनशक्ति प्रदर्शन व खबरदारी सभा जुइगु जूगु दु ।
उगु माइती मण्डलाय् गुथि विधेयकविरुद्ध असार ४ गते विशाल जनशक्ति प्रदर्शन व विशेष सभा यायेगु क्वःछिनातःगु खः । तर, सरकार वाध्य जुयाः म्हिगः मंगलवाः सनिलय् छगू पत्रकार सम्मेलन यानाः उगु गुथि विधेयक लितकयागु घोषणा याःगु दु । अथे सरकारं गुथि विधेयक लितकाःगु घोषणा धुंकाः आः माइती मण्डलाय् थौं उकथं खबरदारी सभा व विशाल जनशक्ति प्रदर्शन ज्याझ्वः यायेगु कथं क्वःछ्यूगु खः ।
थुलि जक मखु, पत्रकार सम्मेलन यानाः गुथि विधेयक लितकाःगु घोषणा याःगु इलय् सरकारं छ्यःगु भाषाप्रति नं आपत्ति प्वंकाः सरकारयात खबरदारी यायेगु पलाः नं थौंया ज्याझ्वलय् जुइगु जानकारी आन्दोलनया न्ह्यलुवाःपिन्सं धाःगु दु ।
सरकारं गुथि विधेयकविरुद्ध आन्दोलित जनसमुदाययात अतिकं क्वह्यंकाः अतिकं बांमलाःगु भाषा छ्यलाः सरकारं गुथि विधेयक लितकाःगु घोषणा याःगु खः ।
सरकारया थुज्वःगु पहः खनाः सचेत नागरिकपिन्सं धाःगु दु, “गुथि विधेयक क्यनेथें लितकाःगु घोषणा जक याःगु खः, खारेज हे याःगु मखु । थ्व सरकारं गुगु नं इलय् थ्व गुथि विधेयकयात हाकनं लागू यायेगु कसरत याइ हे तिनि । उकिं झी सकल सचेत जुयाः च्वने हे माः, आन्दोलन निरन्तर रुपं न्ह्याकाः तुं च्वनेमाः ।”
गुथि विधेयकविरुद्ध आन्दोलित थीथी लागाय् गठन याःगु फुक्क संघर्ष समितिया मंकाः संघर्ष समिति कथं गठन जूगु गुथि विधेयकविरुद्ध संयुक्त प्रतिरोध कार्यक्रम नीस्वंगु खः ।
उगु प्रतिरोध कार्यक्रमं थौं असार ४ गते सुथसिया ११ ता इलय् माइतीघर मण्डलाय् जुइगु विशाल जनशक्ति प्रदर्शन व खबरदारी सभाय् सकलसित उपस्थितिया नितिं इनाप याःगु दु ।
Categorized in नेवाः