telecom 18 kartik 2076

तांन्वःगु ई वलः कच्यूगु प्याज भपियादिसँ

नेवा: अनलाइन न्युज | २०७५ जेठ २३, बुधबार १६:३२:०२

न्हय्गू फाइदा:

तांन्वःगु महिनाय् प्याजयात अतिकं फाइदाजनक कथं कयातःगु दु । कच्यूगु प्याजयात न्हिथंया ज्यःना व बेलिलिसे दुथ्याकाः भपियादिल धाःसा थुकिं थीथी कथंया स्वास्थ्य समस्यायात राहत बिइ । थुकी दइगु एन्टी इन्फ्लामेटरी, एन्टी एलर्जिक व एन्टी अक्सिडेन्ट गुणं थीथी स्वास्थ्य समस्यापाखें बचेयाइ । तांन्वःगु इलय् कच्यूगु प्याजयात सलादया रुपं समावेश यायेबलय् थप फाइदाजनक जुइ ।

१) क्यान्सरलिसे ल्वाइः

युनिभर्सिटी अफ गुएल्फया कथं ह्याउँगु प्याजं छाती व प्वाःया क्यान्सरयात नष्ट यायेत ग्वाहालि याइ । थुकी क्वेरसेटिन व एन्थोसायनिन तत्व अत्याधिक मात्राय् दइगु जूगुलिं क्यान्सरया जीवाणुयात नष्ट याइ ।

२) नुगःचु (मुटु) स्वस्थ तइः

ह्याउँगु प्याजय् दइगु फ्लेभोनोइडं नुगःचुयात स्वस्थ तयेत ग्वाहालि याइ । थुकी ओग्र्यानोसल्फर नं अत्यधिक मात्रा दइगु जूगुलिं नुगःचु ल्वय् लिसे ल्वायेत ग्वाहालि याइ । अर्जेन्टिनाय् जूगु छगू शोधया कथं प्याजय् दइगु ओग्र्यानोसल्फरं नुगःचु ल्वय्या समस्यायात तापाक्क तइ । प्याजय् दइगु थियोसल्फिनेट तत्वं ‘हि’यात प्राकृतिक रुपं सालुकाः ‘हर्ट आट्याक’ हृदयघातपाखें तापाक्क तयाबिइ ।

प्याजं कोलेस्ट्रोलया स्तरयात नं नियन्त्रणय् तइ । गुकिया हुनिं नुगःचु स्वस्थ जुइ । क्याम्ब्रिज युनिभर्सिटी प्रेसया छगू रिपोर्ट कथं प्याजय् दइगु फ्ल्याभोनोइड्सं ल्ह्वंपिं मनूतय्गु ‘ब्याड कोलेस्ट्रोल’ चीकेत ग्वाहालि याइ ।

३) ‘हि’इ चिनिया मात्रा म्हो याइः

प्याजय् दइगु सल्फर (एस–मिथाइलसिस्टेन) व क्वेरसेटिनं ‘हि’इ चिनिया मात्रा म्हो यायेत ग्वाहालि याइ । अय्सां प्याजयात नियमित रुपं मधुमेहया वासःलिसे नयेबलय् जक थुकिं प्रभावकारी ढंगं ज्या याइ ।

४) पाचन क्रियायात बल्लाका बिइः

प्याजय् दइगु इनुलिन नांया फाइबरं पाचन क्रियायात बल्लाकेगु ज्या याइ । इनुनिलं आरुपतिया नितिं माःगु ब्याक्टेरिया ब्वलंका बिइ । थ्व फाइबर नयेबलय् थुकिं म्हगलय् स्वस्थ ब्याक्टेरियाया स्तरयात ल्यंकातयेत ग्वाहालि याइ ।

प्याजय् दइगु मेगु कथंया फाइबर–ओलिगोफ्रुक्टोसं थीथी कथंया झारायात लंकेगु क्षमता ब्वलंकी । अथेहे, फाइटोकेमिकल तत्वं ग्यास्टिक अल्सरया जोखिमयात नियन्त्रणय् तइ ।

प्याजय् दइगु प्राकृतिक प्रिबायोटिक्सं कब्जियतय् नं राहत बिइ । प्याजं प्वाः स्याइगु समस्या, प्वाःया कीतय्त नष्ट यायेगु ज्या याइ ।

५) ल्वय् प्रतिरोधी क्षमताय् बृद्धिः

प्याजय् सेलेनियम दइ, गुकिं ल्वय् प्रतिरोधी क्षमताय् बृद्धि याइ । थुकी दइगु मिनरलं नं ल्वय्लिसे ल्वायेगु क्षमता ब्वलंकाः बिइ ।
प्याजयात रसियाय् स्येखँ चाइगु व मुसु वइगु इलय् वासःया रुपं छ्यलाबुला याइगु प्रचलन दु ।

६) न्ह्यलय् सुधारः

प्याजय् प्रोबायोटिक दइ, गुकिं न्ह्यःयात सुधार व तनाव मुक्त याइगु ज्या याइ धकाः अनुसन्धानं धाःगु दु ।

७) स्वस्थ यौन स्वास्थ्यः

पश्चिमी युगान्डाय् प्याजयात बाँझोपन व इरेक्टाइल डिस्फक्सनय् वासःया नितिं छ्यलाबुला यायेगु यानाच्वंगु दु । प्याजं विशेष यानाः मिजंतय्त फाइदा याइगु धयातःगु दु । प्याजया रसय् कस्ती ल्वाकछ्यानाः त्वनेबलय् मिजंपिनिगु प्रजनन क्षमताय् बृद्धि याइ ।