jivan sahara nepal life

तलबया १० प्रतिशत रकम मांअबुया खाताय् मुंकेमाःगु नीति

नेवा: अनलाइन न्युज | २०७६ भाद्र ४, बुधबार १३:०९:१७

ब्याहा जुइधुंकूम्ह मिसा जागिरे जुइबलय् मांअबु वा ससःबु–ससःमां सुयागुलि रकम मुंकेगु स्पष्ट मजू ।

अंश तकं कयाः ब्यागलं च्वनाच्वंपिनिगु हकय् छु यायेगु, सन्तानया तलबसिबें अप्वः पेन्सन काइम्ह मांअबुया हकय् छु यायेगु, क्वःछ्यूगु कथं मयाइपिन्त गुकथं दायराय् हयेगुथें जाःगु विषयस स्पष्ट मजू ।

नवलपरासी पूर्वया देवचुली नगरपालिका. तलबया १० प्रतिशत रकम थः मांअबुया खाताय् मुंकेमाःगु नीति काःगु दु ।

ज्येष्ठ नागरिकया सम्मानया नितिं नगरपालिकां नगरसभापाखें चालू आर्थिक दँनिसें थःगु तलबया १० प्रतिशत रकम मांअबुया खाताय् मुंकेगु निर्णय याःगु खः ।

नगरपालिकां थःगु नीति व ज्याझ्वलय् तकं थुगु विषययात दुथ्याकूगु दु । वहे आधारय् नगरपालिकां सार्वजनिक सुचं जारी यानाः नगरपालिकाया जनप्रतिनिधि, कर्मचारी, शिक्षकयात थःगु तलबया १० प्रतिशत रकम मांअबुया बैंक खाताय् जम्मा यायेत आग्रह या:गु प्रमुख प्रशासकीय अधिकृत विष्णुप्रसाद भुसाल. धाःगु दु ।

ज्येष्ठ नागरिकं थीथी इलय् थुगु कथंया माग तसें वयाच्वंगुलिं नगरपालिकां वहे कथ. इमिगु माग सम्बोधन यायेत थुज्वःगु निर्णय याःगु प्रमुख प्रशासकीय अधिकृत भुसालं धाःगु दु । नगरपालिकां निजी क्षेत्रय् ज्या याइपिं कर्मचारीपिन्त तकं १० प्रतिशत रकम मुंकेगु नितिं आग्रह या:गु अधिकृत भुसालं धाःगु दु ।

भुसालया कथं नगरपालिकाय् दूगु व्यापार, व्यवसाय याइपिं उद्योगी व व्यापारीपिन्त तक. थःगु आम्दानयिा १० प्रतिशत मांअबुया खाताय् मुंकेत धाःगु दु । भुसालं धाःगु दु, “ज्येष्ठ नागरिकया सम्मानया नितिं नगरपालिकां थुज्वःगु नीति काःगु खः, जिमिसं फुक्कसित आग्रह यानागु दु । थ्व स्वेच्छिक विषय खः ।”

नगरपालिकां मांअबुया खाताय् दां मुंकूपिनिगु धलः तकं मुंकाः तयेगु धासें भुसालं वहे आधारय् कन्हयया दिनय् थ्व सम्बन्धी थप योजना निर्माण यायेगु जानकारी ब्यूगु दु ।

भुसालं धाःगु दु, “जिमिस. फुक्कसित आह्वान यानागु दु, वंगु महिनाया तलब निकासा जूगु मदुनि, जिमित विश्वास दु, फुक्कसिनं थुकियात अनुशरण यानादी ।”

नगरपालिकां सम्बन्धित मनूया खाताय् पारिश्रमिक वनेधुंकाः, वहे कथं थःम्हं कयागु रकमपाखें १० प्रतिशत रकम मांअबुया ब्यागलं बैंक खाताय् मुंकेत धयागु भुसाल. धाःगु दु । ज्येष्ठ नागरिकया सम्मानलिसें इमिगु वासः यायेगु, पोषणय् ग्वाहालि यायेगु आज्जुं थुज्वःगु नीति कयागु देवचुली नगरपालिका मेयर पूर्णकुमार श्रेष्ठं धाःगु दु ।

नगरपालिकाया उगु नीतिं ज्येष्ठ नागरिक उत्साही जूगु मेयर श्रेष्ठं धाःगु दु । थुज्वःगु निितं छुं नं छेँजः दुने ज्येष्ठ नागरिकयात वास्ता मयाइगु खःसा नैतिक दबाब ब्वलनीगु धासें मेयर श्रेष्ठं ज्येष्ठ नागरिक छेँजः दुने अपहेलित जुइगु, विरामि जुइबलय् इलय् वासः मजुइगु, थःगु आवश्यकता पूवंकेत दां मदयाः समस्याय् लाइगुथें जाःगु खँयात थुकिं न्यूनीकरण याइगु धारणा तःगु दु ।

मेयर श्रेष्ठं धाःगु दु, “नैतिकरुपय् थः मांअबुप्रति जिम्मेवार यायेत थुज्वःगु पलाः ल्ह्वनागु खः, थुकिं पारिवारिक सम्बन्धतकं मजबुत यायेत ग्वाहालि जुइ ।”

थुकियात कार्यान्वयन याकेत फुक्क जनप्रतिनिधि छप्पं छधी जूगुलिं थ्व नीति लागू जुइगु विश्वास मेयर श्रेष्ठं काःगु दु । नगरपालिकां न्ह्याकुगु पला: सिर्जनात्मक जूगु देवचुलीया सामाजिक न्ह्यलुवाः खिमानन्द भुसालं धाःगु दु ।

नगरपालिकाया उगु ज्या बांलाःगु जूसां नं उकियात व्यापक सहलह यानाः वहे कथं कार्यविधि दयेका: कार्यान्वयन वंसा अझ बांलाइगु सामाजिक न्ह्यलुवाः भुसालया दाबी दु ।

ब्याहा जुइधुंकूम्ह मिसा जागिरे जुइबलय् मांअबु वा ससःबु–ससःमां सुयागुलि रकम मुंकेगु स्पष्ट मजुगु भुसालं धाःगु दु ।

अंश तकं कयाः ब्यागलं च्वनाच्वंपिनिगु हकय् छु यायेगु, सन्तानया तलबसिबें अप्वः पेन्सन काइम्ह मांअबुया हकय् छु यायेगु, क्वःछ्यूगु कथं मयाइपिन्त गुकथं दायराय् हयेगुथें जाःगु विषयस स्पष्ट जुयाः कार्यविधि दयेकेबलय् कार्यान्वयनय् सहजता जुइगु सामाजिक न्ह्यलुवा: खिमानन्द भुसालं धाःगु दु ।

Categorized in राष्ट्रिय