telecom 18 kartik 2076

तरुण दलय् भुखाय् : मूछ्याञ्जे व नायः दथुइ खटपट

नेवा: अनलाइन न्युज | २०७६ भाद्र २५, बुधबार १४:२४:२९

नेपाल तरुण दलया स्वदँया कार्यकाल क्वचायेत्यंबलय् नाय: जितजंग बस्नेत व मूछ्याञ्जे भुपेन्द्रजंग शाही दथुइ विवाद ब्वलंगु दु ।

मूछ्याञ्जे शाहीं याःगु धाःगु निगू निर्णययात नायः बस्नेतं खारेज याःगु घोषणा यायेधुंकाः विवाद छत्ताछुल्ल जूगु खः ।

मूछ्याञ्जे शाहीं तरुण दल सिन्धुपाल्चोकया तत्कालीन न्वकू सगुन श्रेष्ठया कारवाही फुकुवा व तरुण दल सप्तरीया नायः पदय् सीताप्रसाद यादवयात नियुक्त याःगु खः ।

नायः बस्नेतं बुधवाः सुचं जारी यासें शाहीं याःगु धाःगु निर्णय खारेज यानागु जानकारी ब्यूगु खः । बस्नेतं बुधवाः जारी याःगु सुचनाय् धयातःगु दु, “मूछ्याञ्जे शाहीं थःगु पदीय ज्या, कर्तव्य अःखः अनाधिकृत रुपं याःगु निर्णय अस्वीकृत याना ।”

नायः बस्नेतं सप्तरीया नायः पदय् सुयात नं नियुक्त मयानागु व सगुनया निष्कासन यथावत जूगु जानकारी ब्यूगु दु ।

बस्नेतं मूछ्याञ्जे शाहीयात पदीय मर्यादाय् च्वनेत सचेत नं याकुगु दु । वं जारी याःगु सुचनाय् धयातःगु दु, “नेपाल तरुण दलया मूछ्याञ्जे भुपेन्द्रजंग शाहीयात थःगु पदीय जिम्मेवारीया परिधिय च्वनेत व संगठनया हित अःखः अनिष्ट व्यवहार व क्रियाकलाप मयायेत थ्वहे सुचंपाखें सचेत याकाच्वना ।”

तरुण दल नायः बस्नेत पार्टी सभापति शेरबहादुर देउवा लिक्क लाःम्ह व मूछ्याञ्जे शाही बरिष्ठ नेता रामचन्द्र पौडेल लिक्क लाःम्ह खः ।

कांग्रेसं आन्तरिक किचलोया हुनिं तरुण दलय् नायः, न्वकू, मूछ्याञ्जे व दांभरी बाहेक मेमेगु जिम्मेवारी बाँडफाँड यायेफूगु मदुनि ।

नायः पदय् बस्नेतयात, मूछ्याञ्जे पदय् शाहीयात, न्वकू पदय् सिटौला लिक्क लाःम्ह उत्तम चापागाईंयात व दांभरी खुमबहादुर खड्का लिक्क लाःम्ह विद्वान गुरुङयात नियुक्त याःगु खः ।

इमिगु स्वदँया कार्यकाल वइगु कार्तिक महिनाय् क्वचायेत्यंगु दु । थ्व दथुइ मिलेजुयाः ज्या याःगुथें खनेदुसां नं कार्यकाल क्वचाइगु इलय् धाःसा इमिगु विवाद सार्वजनिक जूगुयात अर्थपूर्ण रुपं काःगु दु ।

वंगु दँया मोहनीया इलय् मूछ्याञ्जे शाही लिसेंयापिन्सं नायः जितजंगया ल्हाःतं सिन्हः त्यूगु किपा: तकं सार्वजनिक याःगु खः ।

Categorized in राजनीति