ad 2076 5 18

तःजिक क्वचाःल रोजी डंगोल श्रेष्ठया याकः सांगितिक सनिल ज्याझ्वः

नेवा: अनलाइन न्युज – ललेन्द्र शाक्य | २०७६ आषाढ २६, बिहिबार २१:२२:२०

नेपालभाषा संगीत ख्यलय् बुलुहुँ लोकंह्वानाः वयाच्वनादीम्ह संगीतकःमि म्येहालामि रोजी डंगोल श्रेष्ठया याकः सांगितिक सनिल थौं बिहिवाः येँया जमलय् च्वंगु राष्ट्रिय नाचघरय् तःजिक ज्याझ्वः क्वचाःगु दु ।

‘सूर–साधना’ नां बियाः न्ह्यानाः वयाच्वंगु थुगु सांगितिक ज्याझ्वलय् रोजी डंगोल श्रेष्ठं थीथी ११ पू म्ये हालाः न्यंकादीगु खः ।

ज्याझ्वलय् मूपाहाँ कथं जनकवि दुर्गालाल श्रेष्ठ झायादीगु खःसा विशेष पाहाँ कथं गोल्डेन भ्वाईस अफ नेपाल प्रेमध्वज प्रधान झायादीगु खः ।

अथेहे, उगु ज्याझ्वलय् ख्यालिजुजु मदनकृष्ण श्रेष्ठ पाहाँ कथं झायादीगु खः ।

म्ये हालामि रोजी डंगोल श्रेष्ठया उगु याकः सांगितिक सनिलय् हनेबहःपिं श्याम तमोट, मनोज गजुरेललिसें ३ नम्बर प्रदेशया सांसद कृष्ण राई, सांसद मैना भण्डारीपिनिगु नं विशेष उपस्थिति दूगु खः ।

सांस्कृतिक संस्थान राष्ट्रिय नाचघरं प्रत्येक महिनाया लिपांगु बिहिवाः पतिकं ‘सूर–साधना’ नां बियाः थीथी संगीतकःमिपिनिगु प्रतिभा न्ह्यब्वयाः वयाच्वंगु दु । थ्वहे झ्वलय् म्येहालामि रोजी डंगोल श्रेष्ठ असार महिनाया लिपांगु बिहिवाःया प्रतिभा जूगु खःसा थ्व १२ क्वःगु श्रृंखला खः ।

उगु ज्याझ्वलय् ख्यालिजुजु मदनकृष्ण श्रेष्ठं नं छत्वाःचा म्ये हालाः न्यंकादीगु खःसा म्येहालामि रोजी डंगोल श्रेष्ठया जहान बालचन्द्र श्रेष्ठं थःगु नुगःखँ तयेगु झ्वलय् थः तिरिमय्जु रोजीयात हःपाः तिबः बियादीगु खः ।

राष्ट्रिय नाचघरया हल खचाखच जाःगुलिं स्वकुमिपिं रोजी डंगोल श्रेष्ठया सांगितिक सवाः कायेमखंक हे आपालं स्वकुमिपिं थःगु छेँ लिहाँ वनेमाःगु खःसा हलय् मनूत सीट मदयाः दनाःसां ज्याझ्वः पूवंक स्वःगु खः ।

म्येहालामि रोजी डंगोल श्रेष्ठं नेवाः अनलाईनन्यूजलिसे खँ ल्हासें धयादी, “आपालं मनूत च्वनेथाय् मदयाः छेँ लिहाँ वनेमाःगुलिं भच्चा जितः म्हाइपुसे च्वंगु दु । हलया सीट जाःगुलिं आपालं मनूत दनाःसां जिगु सांगितिक ज्याझ्वः पूवंक स्वयादीगुलिं थुखेपाखे जि लय्ताः ।”

Categorized in नेवाः