ad 2076 5 18

डोनाल्ड ट्रम्पया सुरक्षा सल्लाहकार जोन बोल्टन बर्खास्त

नेवा: अनलाइन न्युज | २०७६ भाद्र २५, बुधबार १६:११:२०

अमेरिकी राष्ट्रपति डोनाल्ड ट्रम्पं राष्ट्रिय सुरषा सल्लाहकार जोन बोल्टनयात बर्खास्त याःगु दु । थ्वसिबें न्ह्यःया निम्ह सुरक्षा सल्लाहकारया वहिर्गमनलिपा नियुक्त बोल्टनलिसे थःगु असहमति जूगु धासें ट्रम्पं बर्खास्त याःगु खः ।

ट्रम्पया कार्यकालय् राष्ट्रिय सुरक्षा सल्लाहकारपाखें ई मत्यवं हे चीकूम्ह बोल्टन स्वम्हम्ह व्यक्ति खः । थ्वसिबें न्ह्यः मिसेल फ्लाइन व एचआर एमसी मास्टरं ट्रम्पया सुरक्षा सल्लाहकारया भूमिका म्हितूगु खः । तर, ट्रम्पलिसेया असहमति लिपा इपिं चीहाकःगु इलय् हे पिहाँ वनेमाःगु खः । सन् २०१८ या अप्रिलय् स्वम्हम्ह सुरक्षा सल्लाहकारया रुपं दुहाँ वंम्ह बोल्टनयात नं ट्रम्पं आउट यायेधुंकाः थुकिं तरंग हःगु दु ।

ट्रम्पं छगू ट्वीट यासे. पदं राजीनामा बिइत यानागु आग्रह कथं, जोनं मंगलवाः राजीनामा ब्यूगु न्ह्यथनातःगु दु । जोनं राजीनामा ब्यूगु न्ह्यथंसें ट्रम्पं च्वयातःगु दु, “जिं जोनयात राजीनामा ब्यु धयागु खm । व. मंगलवाः सुथय् जितः राजीनामा लःल्हाःगु दु ।”

अय्सां, जोनं धाःसा ट्रम्पं मधायेवं हे थःम्हं पदपाखें राजीनामा बियागु धाःगु दु । जोनं पायछिगु इलय् थःगु धापू सार्वजनिक यायेखंगु नं धाःगु दु ।

पदं बर्खास्त याःम्ह ट्रम्पया धापूप्रति लक्षित यासें जोनं धाःगु दु, “सुनानं मधाःसां नं जिं थःम्हेस्यां हे राजीनामा बियागु खः । पायछिगु इलय् थुकिया बारे थःगु धारणा तयेगु जुइ ।”

परराष्ट्र नीतिया विज्ञ बोल्टन ट्रम्पया स्वम्हम्ह सुरक्षा सल्लाहकार खः । मिसेल फ्लाइन व एचआर एमसी मास्टरं बिदा कायेधुंकाः सन् २०१८ या अप्रिलय् बोल्टन सुरक्षा सल्लाहकारया रुपं ह्वाइट हाउस दुहाँ वंगु खः ।

ट्रम्पं इरान विरुद्ध छ्यःगु कडा रवैयाया मू योजनाकार वहे बोल्टनयात कायेगु याइ । तेहरानया नेतापिंलिसे ट्रम्पं नापलाये चाहेजूगुलि बोल्टनं विरोध याःगु खः । अथेहे, उत्तर कोरियालिसे परमाणु निःशस्त्रीकरण सम्बन्धी शिखर वार्ताय् सकारात्मक भूमिका मम्हितूगु द्वपं अमेरिकी अधिकारीपिन्सं बोल्टनयात ब्यूगु खः ।

सुरया दिनय् निम्ह दथुइ खास हे विवाद खनेमदुगु नं ट्रम्पया लिपांगु विदेशनीतिप्रति बोल्टन असहमत जूगु खः ।

जोनया राजीनामा लिपा रिक्त सुरक्षा सल्लाहकारय् ट्रम्प. सुयात नं नियुक्त याःगु मदु । ट्रम्पं मेगु वाःतकया दुने न्हूम्ह सुरक्षा सल्लाहकार नियुक्त यायेगु धाःगु दु ।

Categorized in अन्तर्राष्ट्रिय