डा. रुपज्योति कसाःया समर्थनय् उदाय समाजं जुलुस व धर्ना याइगु
नेवा: अनलाइन न्युज – ललेन्द्र शाक्य | २०७६ कार्तिक २४, आइतबार ११:२२:५२
‘कालबिलया ‘एग्रिमेन्ट केस’यात छाय् ठगी मुद्दा दयेकल ?’ –सायमि
येँ/विना कारण राज्यसत्ताया आडय् उदाय समाजया नायः रुपज्योति कसाःयात गिरफ्तार याःगु धासें थौं कार्तिक २४ गते आइतवाः न्हिनसिया १२ ताः इलय् येँया असनय् मुना जुलुस न्ह्याकाः माइतीघर मण्डलाय् धर्ना च्वंवनेगु ज्याझ्वः तयातःगु दु ।
उदाय समाजया ग्वसालय जुइगु थुगु जुलुस व धर्ना ज्याझ्वलय् सकलसित ब्वति कयाः न्यायया नितिं बः बिइत समाजं सकसित इनाप नं याःगु दु ।
उदाय् समाजया नायः लिसें प्रतिष्ठित उद्योगी, व्यवसायी डा. रुपज्योति कसाःयात आर्थिक हिनामिनाया द्वपं बियाः प्रहरीं गिरफ्तार याःगु खःसा प्रहरीया थ्व ज्याखँया विरोधय् कसाःया तत्काल त्वःतेगु माग तयाः थौं आइतवाः १२ ता इलय् असनं जुलुस न्ह्यानाः माइतीघर मण्डलाय् धर्ना ज्याझ्वः न्ह्याकेगु निर्णय याःगु खः । कार्तिक २३ गते शनिवाः उदाय् समाज दुनेया गुंगू (९) थरया झिगू (१०) खलः पुचःया मंकाः सहलह याना समाजं थुगु ज्याझ्वः यायेगु क्वःछीगु खः ।
उदाय समाज दुनेया थीथी खलः पुचःया नायो, छ्याञ्जे, उदाय् समाजया ज्यासना पुचःया मंकाः सहलहपाखें थुगु ज्याझ्वः यायेगु मंकाः कथं क्वःछ्यूगु खः ।
डा. रुपज्योति कसाःयात प्रहरीं ज्वंगु खँयात कयाः थीथी जनसमुदायपिन्सं थीथी खँत प्वंकूगु दु ।
थ्वहे झ्वलय् उपत्यकाव्यापी सतकविस्तार पीडित संघर्ष समितिया नायः सुमन सायमिं डा. रुपज्योति कसाःयात छाय् ज्वन धैगु विषयस थःगु नुगःखँ प्वंकादीगु दु । भाजु सायमिं ल्याडमार्ट हाउजिङ्गय् सिईओ रुपज्योति कसाः खः ला ? धकाः न्ह्यसः तसें धयादी “थ्व समस्यायात समाधान यायेगु दायित्व सुयागु ? सिई कन्स्ट्रक्सनया सिईओ कि सेयर होल्डर रुपज्योति कसाःया ? आः रुपज्योति कसाः नं विवाद जूगु हाउजिङ्गय् संवाद यानाः चलन चल्तीया साँवा व ब्याजलिसें लितबिइत तयार दु धाइम्ह सेयर होल्डरयात ज्वनेगु कि सिईओयात ? कम्पनीया सिईओ दयेकदयेकं सेयर होल्डरयात छक्वलं गिरफ्तार यायेगु गनं विचौलियातसें सुनियोजित ढंगं प्लान दयेकाः येँया छम्ह सफल नेवाः उद्योगपति डा. रुपज्योति कसाः व ज्योति ग्रुपयात हे सिधयेकेगु षडयन्त जकं मखुला ?”
कालबिलया ‘एग्रिमेन्ट केस’यात छाय् ठगी मुद्दा दयेकल धैगु न्ह्यसः तसें भाजु सायमिं नं उगु षडयन्त्रया विरुद्धय् थौं न्हिनय् १२ ता इलय् असनं न्ह्याइगु जुलुस व माइतीघर मण्डलाय् धर्ना च्वनेगु ज्याझ्वलय् सहभागी जुइत इनाप यानादीगु दु ।
Categorized in नेवाः