telecom 18 kartik 2076

डा. केसी हाकनं अनसनय्, कार्तिक १३ निसें च्वनेगु ख्याच्वः

नेवा: अनलाइन न्युज | २०७६ आश्विन २७, सोमबार ११:००:५१

डा. गोविन्द केसीं थःगु माग पूमवंतले कार्तिक १३ गतेनिसें अनसन च्वनेगु धाःगु दु । डा. केसीं माग पूवंकेत कार्तिक ८ गतेतक ११ न्हुया अल्टिमेटम ब्यूगु दु ।

सोमवाः टिचिङ अस्पताल महाराजगञ्जय् पत्रकार सम्मेलन यानाः डा. केसीं थःलिसे सरकारं विगतय् याःगु सम्झौता कार्यान्वयन जुइमाःगु धाःगु दु । डा. केसीं धाःगु दु, “सम्झौता अप्वः जुल, तर कार्यान्वयन मजुल ।”

डा. केसीं चिकित्सा क्षेत्रय् सुधार, नियक्ति प्रणालीइ दलीय भागबण्डा अन्त्य जुइमाःगु, थीथी आयोगं दोषी ठहर याःपिन्त कारवाही जुइमाःगु, अवैध शुल्क काइगु निजी मेडिकल कलेजया संचालकपिन्त कारवाही यायेमाःगु लिसेंया माग तःगु दु ।

त्रिवि शिक्षण अस्पतालया सेवापाखें अवकास प्राप्त डा. केसीं आः गन अनसन च्वनी धैगु बारे जानकारी ब्यूगु मदु । थः नेपाःमि नागरिक जूगुलिं नेपाःया न्ह्याग्गु नं कुं कुनय् थ्यंकाः नं अनसन च्वनेफूगु डा. केसीया धापू खः । मुक्कं नेपाःमिया स्वास्थ्य व शिक्षाया नितिं ल्वानागुलिं न्ह्याथाय् नं जनतां ग्वाहालि याइगु डा. केसीं धाःग दु ।

डा. केसीं धाःगु दु, “नेपाःमि नागरिक जूगुलिं देसया न्ह्याग्गु नं कुनय् थ्यंकाः अनसन च्वनेफु । नेपाःमिया स्वास्थ्य व शिक्षाया नितिं ल्वानागुलिं न्ह्याथाय् वंसां नं जनताया ग्वाहालि जितः दइ ।”

Categorized in राजनीति