नेवा: अनलाइन न्युज | २०७६ भाद्र १६, सोमबार १७:१८:३०

सरकारं नेपाल टेलिकमय् थःगु स्वामित्वय् दूगु ६६ प्रतिशत शेयर तयाः ल्यंदूगु शेयर मिइगु नितिं तयारी याःगु दु ।

आः धितोपत्र बजारय् सूचीकृत जूगु दकले अप्वः शेयर हिस्सा दूगु कम्पनीया थप शेयर जनतायात बिइगु तयारी याःगु खः । कम्पनीया शेयर संरचना कथं ९१.५२ प्रतिशत संस्थापक शेयर अर्थात् नेपाल सरकारया दुसा ८.४८ प्रतिशत शेयर आमसर्वसाधारण व कर्मचारीया दु । 

संचार व सूचना प्रविधिमन्त्री गोकुलप्रसाद बाँस्कोटां नेपाल टेलिकमया थप शेयर आम नागरिकपिन्त बिइगु विषयस सहलह जुयाच्वंगु जानकारी ब्यूगु दु ।

मन्त्री बाँस्कोटां सरकारी स्वामित्वय् दूगु छुं शेयर सर्वसाधारणयात मिइमाः धैगु विषयस सहलह जुयाच्वंगु धाःगु दु । मन्त्री बाँस्कोटां धाःगु दु, “सरकारं ६६ प्रतिशत शेयर तयाः ल्यंदूगु सर्वसाधारणयात ब्यूसां ज्यू धैगु पक्षय् मन्त्रालय दु ।”

टेलिकमय् मुक्कं १ करोड २७ लख कित्ता शेयर जक सर्वसाधारणया दु । शेयर संरचना कथं सर्वसाधारण शेयरधनीया ४.४४ प्रतिशत, कर्मचारीया ४.०४ प्रतिशत व नागरिक लगानी कोषया ०.०३ प्रतिशत शेयर स्वामित्व टेलिकमय् दु ।

धितोपत्र बजारय् नेपाल दूरसंचार कम्पनी लिमिटेडया मुक्कं १५ करोड कित्ता शेयर सूचीकृत दु । बजार मूल्यया आधारय् उगु कम्पनीया शेयर प्रतिकित्ता ६६३ तका मूल्यस कारोबार जुयाच्वंगु दु । बजार पूँजीकरणय् न्ह्याबलें शीर्ष थासय् लानाः वयाच्वंगु उगु कम्पनीया बजार क्वाहाँ वःगु अवस्थाय् तकं ९९ अबृ ४५ करोड तका बराबरया जूगु दु । उगु कम्पनीं आर्थिक दँ २०६६–०६७ स शेयरधनीयात ४० प्रतिशत लाभांश ब्यूगु खःसा आर्थिक दँ २०७४–०७५ स ५५ प्रतिशत लाभांश ब्यूगु दु । कम्पनीं वंगु साउनय् पिथंगु आर्थिक दँ २०७५–०७६ या धलः कथं आम्दानइि ३ अर्बसिबें अप्वःया ह्रास वःगु दु ।

अनुमतिपत्र बापतया खर्च अप्वयाः नाफाय् गिरावट वःगु कम्पनी जानकारी ब्यूगु दु । आर्थिक दँ २०७५–०७६ या वित्तीय धलः कथं टेलिकमया नाफा २०७४–०७५ या तुलनाय् ७ अर्ब २७ करोड २७ लख तकां म्हो जूगु दु । टेलिकमं आर्थिक दँ २०७५–०७६ या दच्छिया ुने १० अर्ब २० करोड ८१ लख तका दां खुद मुनाफा कमेयाःगु दु । थुज्वःगु नाफा आर्थिक दँ २०७४–०७५ य् १७ अर्ब ४८ करोड ३८ लख जूगु टेलिकमं सार्वजनिक याmगु वित्तीय धलखय् न्ह्यथनातःगु दु ।

मन्त्री बाँस्कोटाया कथं सरकारयात कर व नवीकरण शुल्क अप्वः पुलेमालीबलय् नं कम्पनीया नाफा छुं म्हो जूगु खः । टेलिकमं नवीकरण शुल्कबापत २० अर्ब पुलेमालीगु जूगु दु । मन्त्रिपरिषदया वंगु जेठ १०, १३ व १५ गते च्वंगु बैठकं छ किस्ताय् उगु नवीकरण शुल्क पुलेमाःगु निर्णय याःगु खः ।

मोबाइल सेवा संचालनया नितिं अनुमति कायेधुंकाः न्हापांगुखुसि १० दँय् छक्वः व निक्वःगुखुसि ५ दँय् अनुमतिपत्र नवीकरण यायेमाःगु व्यवस्था दु ।

टेलिकम. २०५६ सालय् लिपा निर्धारण जुइगु नवीकरण शुल्क पुलेगु शर्तय् मोबाइल सेवा संचालन यायेगु कथं अनुमति काःगु खः ।

नाफा म्हो जुइगु व नवीकरण शुल्क नं पुलेमाःगु सन्दर्भय् मन्त्री बाँस्कोटां धाःगु दु, “घ्यः गन लात केँय् ।”

मन्त्री बाँस्कोटां संस्थाया समग्र हितयात विचाm यानाः जक हे टेलिकमया रणनीतिक साझेदार दुकायेगु विषयस सहलह न्ह्यानाच्वंगु धाःगु दु । मन्त्री बाँस्कोटां धाःगु दु, “जिमित चित्त बुझेजुल धाःसा जिमिसं हयेफु । खास हे धायेगु खःसा प्रविधि व ज्ञान शेयर यासें भौतिक पूर्वाधारया विकासया नितिं थःगु हितया संरक्षण व सुरक्षित यानाः जक हे हयेगु जुइ । उक िआर्थिक, प्राविधिक, संस्थागत हित संरक्षण यायेगु जुइसा कर्मचारयिा सुरक्षा लिसेलिसेंया विषय नं उकी कःघाइ ।”

आः टेलिकमया चुक्ता पूँजी १५ अर्ब तका दुसा संचित कोषय् ८६ अर्ब ७३ करोड १७ लख तयातःगु दु । टेलिकमं दच्छिया दुने सेवा विक्रीपाखें ३६ अर्ब ७८ करोड ४८ लख कमेयाःगु दु । विश्वव्यापी रुपं हे टेलिकम क्षेत्रय् भ्वाइस व एडीएसएलपाखेया आम्दानी म्हो जूगुलिं उकिया लिच्वः नेपालय् न. लाःगु दु ।

Categorized in बजाः