nepal lifef 2076 8 8

झिक्वःगु नेवाः एकता दिवस हनेगु तयारी

नेवा: अनलाइन न्युज | २०७६ मङ्सिर १५, आइतबार १८:४२:०७

वंगु झिदँ न्ह्यः ने.स.११३० पोहलाथ्व नवमी न्हिं न्हूगु संविधानय् नेवाः लागायात ‘नेवाः प्रदेश’ नामांकन यायेमाःगु माग यासें येँया दशरथ रंगशालाय् नेवाःतसें याःगु शक्ति प्रदर्शनया लुमन्तिइ व नेवाः आन्दोलनयात निरन्तर न्ह्याकातयेगु आज्जु ज्वनाः वइगु पुस १९ शनिवाः नेवाः देय् दबूया संयोजनय् झिक्वःगु नेवाः एकता दिवस तःजिक हनेत्यंगु दु ।

 

न्हापांगु नेवाः एकता दिवस थीथी राजनीतिक पार्टीतय्गु भातृ संगठन व जातीय संगठनपिनिगु मंकाः संस्था नेवाः स्वायत्त राज्य मंकाः संघर्ष समितिया ग्वसालय् जूगु खः ।

न्हूगु संविधान जारी जुइधुंकाः प्रदेशया नामांकन मयाःगु व संविधान कार्यान्वयनया झ्वलय् स्वंगू तहया सरकारया चुनाव जुइधुंकूगु स्थितिइ नं नेवाःतय्गु माग नेवाः प्रदेश हे खः धासें थथे निरन्तरता बिइगु नितिं पुस १९ गते गुक्वःगु नेवाः एकता दिवस हनेत्यंगु खः ।

 २०७२ असोज ३ गते जारी जूगु नेपाःया  न्हूगु संविधानय् नेवाः स्वायत्त राज्य सुनिश्चितता मजूगु व अन्तरिम संविधानय् व्यवस्था दूगु आदिवासी जनजाति व उत्पीडित समुदायया अधिकार तकं क्वपालेगु ज्या जूगुलिं संविधान संशोधन यानाः नेवाः स्वायत्त राज्य सुनिश्चितता यायेमाःगु माग यासें थथे एकता दिवस हनेत्यंगु खः । 

 

Categorized in नेवाः