nepal lifef 2076 8 8

ज्या याःवनीपिनिगु नितिं जापानं छ्वयाहल औपचारिक प्रस्ताव

नेवा: अनलाइन न्युज | २०७५ पौष १८, बुधबार १४:५०:२६

वंगु वाः जापानी सरकारं थीथी ९ गू देसपाखें ज्या याइपिन्त यंकेगु निर्णय यायेधुंकाः ज्या याइपिं आपूर्ति सम्बन्धी औपचारिक प्रस्ताव नेपाः छ्वयाहःगु दु ।

भियतनाम, फिलिपिन्स, इन्डोनेसिया, कम्बोडिया, चीन, थाइल्याण्ड व म्यानमार लिसेंया देसय् जापानी भाषाया परीक्षा कायेगु निर्णय यानाः निगू देसया थाय् खाली तयातःगुलि जापानया मन्त्रिपरिषद बैठकं नेपाः व मंगोलियापाखें तकं ज्या याइपिं दुकायेगु निर्णय याःगु खः ।

जापानं नेपाःया परराष्ट्र मन्त्रालयमार्फत श्रम रोजगार व सामाजिक सुरक्षा मन्त्रालयस ज्या याइपिं आपूर्ति यायेगु प्रस्तावया ड्राफ्ट छ्वयाहःगु श्रम, रोजगार व सामाजिक सुरक्षा मन्त्रालयया छ्याञ्जे महेशप्रसाद दाहालं जानकारी बियादीगु दु ।

उगु प्रस्तावयात कयाः सहलह ब्याकाः निष्कर्ष पिकयाः लिसः छ्वयेगु तयारी दूगु वय्कलं धयादीगु दु । जापानं उगु प्रस्ताव छ्वयाहये धुंकाः नेपाःपाखें ज्या याइपिं यंकीगु निश्चित जूगु वय्कलं धयादीगु दु ।

दाहालया कथं नेपालं अन्तर्राष्ट्रिय श्रम संगठनया मापदण्ड कथं श्रम सम्झौता यानाः ज्या याइपिं जापान छ्वयेगु तयारी याःगु दु ।

ज्या याइपिं यंकेगु विषयस सम्झौता यायेत जापानी पुचः थ्वहे महिनाया लिपांगु ईतकया दुने नेपाः थ्यंकीगु जानकारी वःगु वय्कलं धयादीगु दु ।

सुं नं व्यक्तियात होहल्लाया भरय् ब्वां जुयाः औपचारिक सम्झौता मजूतले तक छुं प्रक्रिया न्ह्यःने मयंकेत वय्कलं सुझाब बियादीगु दु ।

१८ दँ उमेर थ्यंपिं व्यक्तिपिन्त रोजगारय् यंकेगु व उकिया नितिं छुं नं कथंया दलालया सहारा व छुं नं रकम डिपोजिट तयेम्वाःगु ब्यवस्था याइगु जापान सरकारं स्पष्ट याःगु दु ।

Categorized in लजगाः