nepal investment baink

ज्यापु महागुथि पश्चिम लागा हाकनं धनबीरया नेतृत्वय्

नेवा: अनलाइन न्युज | २०७६ श्रावण २०, सोमबार १५:५१:५७

ज्यापु महागुथि पश्चिम लागां हाकनं छकः धनबीर महर्जनयात हे नायः ल्यःगु दु । शनिबाः गुर्जुधाराय् क्वचाःगु महागुथि पश्चिम लागाया स्वक्वःगु अधिवेशनं पुलांम्ह नायः धनवीर महर्जनयात हे हाकनं नायः ल्यःगु खः ।

सर्वसम्मतं ल्यःगु न्हूगु कार्यसमितिया न्वकुलिइ चन्द्रशेखर महर्जन दुसा सम्पूर्ण महर्जनयात छ्यान्जेया भाला चूलाःगु दु । अथे हे, शिशुपाल महर्जन दांभरिं ल्यःगु ज्यासना पुचलय् धवेन्द्र महर्जन ल्यू दांभरिं जूगु दु ।

दुजलय् धनकृष्ण महर्जन, रमेश महर्जन, धनबहादुर महर्जन, राजेश महर्जन, ललिक महर्जन, दिनेश महर्जन, नेसन महर्जन, तेजमाया महर्जन, अष्टमाया महर्जन व सानु महर्जन दु ।

व स्वयां न्ह्यः अधिवेशनया उलेज्या सत्रय् चन्द्रागिरी नगरपालिकाया मेयर घनश्याम गिरिं भाषा, कला, साहित्य, सँस्कृति हे देय्या सम्पत्ति खःगु धासें देय्या सम्पत्ति संरक्षण यायेत नेपाःगाःया स्थानीय सँस्कृतिया रक्षा यायेमाःगु धयादिल । स्थानीय सँस्कृतिको संरक्षण, सम्वद्र्धन यायेगु नेवाः संग्रहालयया स्थापना यायेगु घोषणा चन्द्रागिरी नगरपालिका प्रमुख गिरीं यानादिल ।

ज्यापु महागुथिया केन्द्रीय नायः राजभाई जकःमिं साः कुब्वीपिं ज्यापुतय्सं आः देय् कुब्वीगु धयादिल । महागुथि पश्चिम लागा नायः धनवीर महर्जनं पश्चिम लागाया ज्यापु समुदाययात छधी दयेकाः सकल ज्यापु समुदायया लिसें नेवाः समुदाययात हे थकायेगु नितिं क्रियाशील जुयाच्वनेगु प्रतिवद्धता प्वंकादिल ।

उगु हे ज्याझ्वलय् स्थानीय निर्वाचनय् पश्चिम लागां निर्वाचित ज्यापु समुदायया न्याम्ह वडाध्यक्षयात हंगु नं खः । ज्याझ्वलय चन्द्रागिरी नगरपालिका उपमेयर लिशा नकर्मी, ज्यापु महागुथिया केन्द्रीय वरिष्ठ न्वकू सन्तु महर्जनलिसेंया उपस्थिती दुगु खः ।

Categorized in नेवाः