telecom 18 kartik 2076

ज्ञान गुण बियाः शिक्षा आर्जन याकुम्ह व्यक्तियात हनेगु न्हि गुरुपुन्हिं

– डा. चुन्दा बज्राचार्य –
मांया ख्वाः स्वयेगु, अबुया ख्वाः स्वयेगु, थःगु आत्मायात थःम्हं पूजा यायेगु म्हपूजा, थःस्वया. थ“पिंक्व“पिं दाजुकिजापिन्त पुजा यायेगु किजापुजा, इहि मयाःनिपिं मिसा मचातय्त पूजा यायेगु कुमारी पूजा, ब्रतबन्ध मयाःनिपिं मिजं मचातय्त पुजा यायेगु कुमार पुजा थें तुं थःत आखः स्यनाः ज्ञान गुण बियाः शिक्षा आर्जन याकेब्यूम्ह व्यक्तियात यायेगु पुजा खः – गुरु पुजा । गुरु पुजा यायेगु चलन नं नेवाः समाजया पुलांगु परम्परा खः । दिल्लाथ्व पूर्णिमा अर्थात् आषाढशुक्ल पूर्णिमायात गुरु पूर्णिमा धकाः गुरुयात पुजा यानाः आदर सत्कार यायेगु दिं खः । गुरु मदयेकं ज्ञान पूर्ण जुइमखु, गुरु मदुगु ज्ञान व अबु मदुम्ह मचा बराबर खः अथे धयागु अपुरो खः । न्हापा न्हापा गुरुया ज्या याइपिं बज्राचार्य, द्यःभाजु, आचाजु, ब्राम्हण आदि खः । थुमिसं थौंकन्हय्तक नं पुरोहितया ज्या यानाच्वंगुलिं थुमित गुरु वा गुरुजु धायेगु चलन दु । नेवाः समाजय् गुरुया थाय् च्वन्ह्याका तयातःगु दु । छुं नं पूजा यायेमाल धाःसा गुरुजुपिन्त हे याका तयेगु चलन दु । नापं अंशवन्दा वा छखे च्वनाः जा नयेमाल वा ब्यागलं च्वनेमाल वा छगू थासं मेगु थासय् द्यः तयेमाल वा परम्पराकथं न्ह्याका हयाच्वंगु छुं नं रितिथितिइ छुं परिवर्तन याये माल धाःसा थज्याःगु इलय् गुरुया वचन कयाः गुरु वचनं शिरोपर धकाः नाला कायेगु याः । थ्व फुकं गुरुयात हनावना यानातःगु कारण खः । अथेतुं झी सराद्ध याइबलय् राजमाता, राजपिता, गुरुमाता, गुरुपिता धकाः गुरुया नामय् नं पिण्डदान बीगु चलन दु । अथे तुं बौद्ध धर्मावलम्बी जुइमा वा हिन्दु धर्मावलम्बी जुइमा निगुलिं धर्मालम्बीपिसं गुरुयात हनावना याना वयाच्वंगु दु । गथे गुरु बुद्ध, गुरु धर्म, गुरु संघ तथइवच... गुरु बज्र, धरश्चैव तस्मैश्री गुरुभ्य नमः धकाः छु नं पुजा याइबलय् महामञ्जुश्री गुरुयात आराधना यानाः गुरुयात नमस्कार यानाः तिनि पुजा सुरु यायेगु चलन दु । अथे तुं हिन्दू धर्मावलम्वीपिनि गुरु ब्रम्हा, गुरु विष्णु गुरु देव महेश्वर, गुरु साक्षात् परब्रह्म तस्मै श्री गुरवे नमः धकाः सम्बोधन यानातःगु दु । अथे जूगुलिं हे समाजय् गुरु व विद्यार्थीया दथुइ इहिपा याये मज्यू धयागु धारणा दु । थ्व धारणा नेपाली समाजय् जक मखु पाश्चात्य समाजय् नं थम्हं ब्वंकातःपिं विद्यार्थी नाप वैवाहिक स्वापू मतः ।
गुरु व शिष्यय् मिसा मिजंया आकर्षण जुइमज्यू धयागु धारणा दु । गुरुप्रति छुं नं द्रोहयात धाःसा वैगु ज्ञान ¥हास जुइ धयागु विश्वास नं दु । गुरु धकाः नां कायेवं पूजा याइपिं वा आखः स्यनीपिं जक मजुसें छुं नं ज्ञान बीम्ह, आखः स्यनीम्ह नं गुरु खः । थने चाया भाडा ज्यायेगु स्यनीम्ह गुरु, पुंज्या स्यनीम्ह, बुत्ता कीगु थाज्या स्यनीगु आदि छुं नं ज्या स्यन धाःसा व गुरु हे खः ।
न्हापान्हापा छम्ह हे गुरुं तःताजि ज्ञान बियाः विशेष विशेष ज्ञान विशेष विशेष गुरुपिन्सं बीगु चलन दु । उगु इलय् स्य“क्व धाक्वसित गुरु कथं हनेगु चलन दु । तर थौंकन्हय् छुं नं छगू ज्या स्यंम्हेसित नं गुरु धकाः हनावना यायेगु उलि सम्भावना मदये धुंकल । थ्व सम्भावना नं मदु न्हापा न्हापा दक्व शिक्षा सफुलिइ उद्घृत यानातःगु मजुसें फुकं हे ज्ञान गुरुया म्हुतुं वा व्यवहारं ज्ञान बीगु जूगुलिं उगु इलय् गुरुया शक्तियात दैवीय शक्ति स्वरुप कायेगु याः । अथे तुं गुरुयात महामञ्जुश्री÷सरस्वतीया प्रतीकया रुपय् कायेगु याः । अज्याःपिं ज्ञानीपिन्त हनेगु दिंकथं गुरु पूर्णिमा धकाः छगू विशेष दिन हे दु । व खः आषाढ शुक्ल पूर्णिमा अर्थात् दिल्लाथ्व पुन्हि खः । उगु इलय् थः विद्यार्थीपिन्त ज्ञान बीगुया लागि गुरुपिसं नं थःगु अनुशासनय् च्वनाः थःगु व्यक्तिगत स्वार्थयात त्याग यानाः विद्यार्थीपिन्त ज्ञान बीगु याः । अथे जूसां गुरुपिं तःधं मजुसें साधारण जीवन हनेगु याः । तर विद्यार्थीपिन्सं नं थःगु लागि त्याग तपस्या यानाः पुरुषार्थ क्यंम्हसित हनावना याइगु नं स्वभाविक जुल । उगु ईया परम्परानिसें शुरुवात जूगु हनावना थौंतक्क छगू परम्पराकथं न्ह्यानाच्वंगु दु । ब्वनेकुथि वा सरस्वतीयात पूजा यानाः वया नापनापं गुरुपिन्त भक्तिभावं पूजा यायेगु चलन दु । अथे तुं व्यक्तिगत रुपं ब्वनेकने यानाच्वंपिं विद्यार्थीपिसं गुरुया छे“य् वनाः गुरुयात थःगु नसा त्व“सा नकेगु नं चलन दु ।
बुद्ध धर्म कथं दिल्ला पुन्हि कुन्हु सिद्धार्थ गौतम बुद्ध मनू जन्म कयाः बिज्यायेत मायादेवीया गर्भय् प्रवेश जुयाबिज्याःगु खः । अथे तुं थ्व हे दिं कु्न्हु सिद्धार्थ गौतमं बुद्धत्व प्राप्त यानाः बिज्यायेत थःगु दरवार त्वःताः महाभिनिष्क्रमण याना बिज्याःगु दिं नं खः । वय्कःपिन्त एहिभिक्खु धकाः ओवाद वाक्यद्वारा उपसम्पदा यानाः बिज्यानाः वसपोल गुरु जुया बिज्याःगुलिं थ्व पुन्हिया महिमा अप्वः दुगु खः । धर्मचक्र प्रवर्तन सूत्रया उपदेश बिया बिज्याःगु धैगु हे प्यंगू आर्य सत्य व च्यागू आर्य अष्टाङ्गिक ल“पु नाप प्रतित्य समुत्पाद सिद्धान्त बारे धर्मोपदेश यानाबिज्याःगु खः ।
थुकथं गुरु पुन्हि कुन्हुया दिंयात नेवाः समाजय् थीथी कथं हनेगु याः ।