telecom 18 kartik 2076

ज्ञानेन्द्रयात पार्टी चायेकाः चुनाव ल्वायेत भट्टराईया सुझाव

नेवा: अनलाइन न्युज | २०७६ आश्विन ३०, बिहिबार १४:४१:३१

समाजवादी पार्टीया नायः डा. बाबुराम भट्टराई नं पद माःसा पार्टी चायेकाः चुनाव ल्वायेत पदच्यूट जूम्ह जुजु ज्ञानेन्द्र शाहयात सुझाव ब्यूगु दु ।

पार्टीया ग्वसालय् बिहिवाः सदरमुकामय् जूगु नखःचखm लक्षित भिंतुना कालबिल ज्याझ्वलय् न्वःवासें डा. भट्टराई नं राजतन्त्र लिहाँ वइगु सम्भावना मदूगु धाःगु दु ।

डा. भट्टराई नं धाःगु दु, “राजतन्त्र मजिल धकाः गणतन्त्र हयागु खः । राजतन्त्र लिहाँ वइ धकाः शंका यायेम्वाः, छुं नं हालतय् वइगु मखु व वये नं मज्यू ।”

जातीय व वंशीय आधारय् देस चलेयायेगु दिं समाप्त जुइधुंकूगु तर्क बिसें डा. बाबुराम भट्टराई न. लोकतान्त्रिक गणतन्त्र लिपा मुलुक विकास व समृद्धिया न्हूगु चरणय् थ्यंगु व एजेण्डा तकं हिलेधुंकूगु धाःगु दु ।

पुलांम्ह प्रधानमन्त्री तकं जुयादीम्ह डा. बाबुराम भट्टराई नं धाःगु दु, “पूर्व जुजु ज्ञानेन्द्रयात जिगु पद आवश्यक जू धैगु मनय् दुसा पार्टी चायेकाः चुनाव ल्वाःसां ज्यू । पारस व हिमानीयात नं चुनावय् थंसां ज्यू । जनतां चुनाव त्याकल धाःसा देस चलेयाःसां ज्यू, जिमित उकी छुं आपत्ति मदु ।”

मोहनीया इलय् जनता सिन्हः तिइत वन धायेवं राजतन्त्र वइ धैगु गलत जुगु डा. भट्टराईया धापू खः ।

डा. भट्टराई नं धाःगु दु, “नखःचखःया इलय् पूर्व जुजुलिसे जनतां सिन्हः तिल धायेवं जुजु माल धायेगु गलत खः, भच्चा तापाक्क वनेधुंकाः राष्ट्रपतिया ल्हाःतं नं सिन्ह तिइ, प्रधानमन्त्री लिसे नं तिइ, व तःधंगु खँ मखु । झीपिं आः गणतन्त्रपाखें ल्यूने लिहाँ वनेफइमखु ।”

गणतन्त्रयात न्हुयाः समृद्ध नेपाल दयेकेगु एजेण्डाय् न्ह्यःने वनेत भट्टराई नं फुक्कसित आग्रह तकं याःगु दुसा दलत दथुइ एकताया आवश्यक जूगु खँ नं धाःगु दु ।

Categorized in राजनीति