nepal lifef 2076 8 8

जापान रोजगारीः ज्याकःमि भर्ना व छनोट पारदर्शी यायेत बः

नेवा: अनलाइन न्युज | २०७५ पौष २४, मंगलबार १२:३३:५०

नेपालं जापानय् ज्याकःमि छ्वयेबलय् भर्ना व छनोट प्रणालीयात पारदर्शी व निष्पक्ष यायेमाःगुलि बः ब्यूगु दु ।

श्रम, रोजगार व सामाजिक सुरक्षामन्त्री गोकर्ण विष्टलिसे नेपाःया नितिं जापानी राजदूत मासामिची साइगों यानादीगु शिष्टाचार नापलाये ज्याय् मन्त्री विष्टं ज्याकःमिया योग्यता, क्षमता, सीप व दक्षताया आधारय् प्रतिस्पर्धात्मक प्रक्रियापाखें ज्याकःमिया छनोट पारदर्शी रुपं जुइमाःगु धयादिल ।

नेपाली युवा ज्याया नितिं जापान वनीबलय् छुं मध्यस्थता व विचौलियाया ठगीइ मलायेमा धैगु विषयस सरकार सजग जूगु तकं वय्कलं धयादिल ।

उगु नापलाये ज्याय् वय्कःपिनिगु दथुइ निगू देसया पारस्परिक हित अनुकूल उपयुक्त विधि, प्रक्रिया व संयन्त्र तयार यानाः अपेक्षित इलय् हे जापानय् ज्याकःमिपिं छ्वयेगु प्रक्रिया न्ह्यःने यंकेगु विषयस तकं सहलह जूगु खः ।

नापलाये ज्याय् राजदूत साइगों नेपाली श्रमिकयात पारदर्शी व प्रतिस्पर्धात्मक प्रक्रियापाखें जापान छ्वयेगु सन्दर्भय् जापान सरकारया धारणा सकारात्मक जूगु धयादिल । वय्कलं नेपाली ज्याकःमिपिन्त जापान यंकेगु विषयस ज्या न्ह्यःने वनेधुंकूगु जानकारी नं बियादिल ।

नेपाली ज्याकःमिपिन्त जापान यंकेगु विधि व प्रक्रियाया विषयस सहलह यायेत जापानं प्राविधिक पुचः वइगु माघ महिनाय् नेपाः वयेत्यंगु दु ।

Categorized in लजगाः