ad 2076 5 18

जापानय् नेपाल फेष्टिभल ः न्हापांगुखुसि जापानया नागोयाय् जुइगु

नेवा: अनलाइन न्युज | २०७६ जेठ २५, शनिबार १२:४२:२४

नेपाःमिपिनिगु आपालं बाहुल्यता दूगु जापानया नागोयाय् न्हापांगुखुसि यायेत्यंगु नेपाल फेष्टिभल २०१९ या तयारी पूवंगु जानकारी ग्वसाः खलकं ब्यूगु दु ।

भिजिट नेपाल २०२० या पूर्वसन्ध्याय् यायेत्यंगु उगु नेपाल फेष्टिभलं नेपाल व जापानया स्वापू बालांकीगु लिसें भ्रमण दँयात नं ग्वाहालि जुइगु ग्वसाः खलकं दाबी याःगु दु ।

फेष्टिभल थ्व हे जून १५ व १६ य् साकाय च्वंगु हिसाय दोहारी पार्कय् जुइगु जूगु दु ।

नेपाली कला संस्कृति, नेपालय् जुइगु परम्परागत झाँकीत, नेपाली पंचेबाजाया लिसें नेपाली रहनसन, नसाज्वलं, संगीत फेष्टिभलया मू आकर्षण जुइगु जानकारी ब्यूगु दु ।

जापानी नागरिक दथुइ नेपाःयात म्हसीकेगु यासें २०२० या भिजिट नेपालय् जापानीज नागरिकपिन्त निमन्त्रणा यायेगु महोत्सवया मू आज्जु जूगु कजि पारसमणि पोखरेलं धाःगु दु ।

फेष्टिभल नेपाली दूतावास व एनआरएनएन नागोया क्षेत्रया मंकाः ग्वसालय् जुइगु जूगु दुसा नागोयाय् क्रियाशील सकल संघसंस्था ल्यू ग्वसाःखलः जुइगु जूगु दु ।

इभेन्ट पार्टनर नेपाल एयरलाइन्स जुइगु उगु फेष्टिभलय् थीथी संघसंस्था व नेपाःपिनिगु प्रायोजन जुइगु जूगु दु ।

ज्याझ्वःया कजि पोखरेलया कथं थ्वहे जून १५ तारिख जापानया नितिं नेपाली राजदूतपाखें फेष्टिभल उलेज्या जुइ । फेष्टिभलय् आइची प्रिफेक्चरया गभर्नर, नागोयाया उपमेयर, ओबु सिटीया मेयर, जापानया सांसदपिं लिसेलिसें जापानया उच्च अधिकारीपिनिगु विशिष्ट पाहाँया रुपं उपस्थिति जुइगु जूगु दु ।

अथेहे, एनआएनए केन्द्रीय नायः भवन भट्ट, न्वकूपिं कुमार पन्त व कुल आचार्य, अमेरिका कजि गौरीराज जोशी लिसेंया पदाधिकारीपिनिगु नं फेष्टिभलय् उपस्थिति दइगु जानकारी ब्यूगु दु ।

Categorized in अन्तर्राष्ट्रिय