telecom 18 kartik 2076

जापानय् ग्यानापुगु धाकुफय् ः न्याम्हं मल्याक्क सित, ७० लख मनूत विस्थापित

नेवा: अनलाइन न्युज | २०७६ आश्विन २६, आइतबार ११:५७:४८

जापानय् वःगु ६० दँलिपाया हे दकले तःधंगु ग्यानापुगु धाकुफसं (आँधी) कम्ती नं न्याम्ह मनूत सीगु दुसा ९० म्हसिबें अप्वः घाःपाः जूगु दु । धाकुफय् लिपा वा वःगु व चलः कुतुं वयःगु खःसा जापानया आपालं थासय् जनजीवन प्रभावित जूगु दु ।

राजधानी टोकियापाखें दक्षिण–पश्चिमय् च्वंगु इगु प्रायद्वीपय् शनिवाः स्थानीय ई कथं सनिलया ७ ता इलय् वःगु अगिबास नांया धाकुफसं वा व चलः वःगु अन्तर्राष्ट्रिय संचारमाध्यमतसें जानकारी ब्यूगु दु । क्योडो न्यूज एजेन्सीया कथं धाकुफय् लिपाया वा व चलखं आःतक न्याम्ह मनूत सीधुंकूगु दु ।

वा वयेधुंकाः वःगु चलखं यानाः छेँ हे चुइकूगु दुसा गुकी निम्ह मनूत सीगु दु । खुसिबाः वयाः छेँ चुइकूबलय् टोमिकोय् छम्ह मिजं व टोकिया लिक्कया सागामिहाराय् छम्ह मिसाया ज्यान वंगु खः । कावासकीया अपार्टमेनट, टोचिगी व चिवाय् छम्ह छम्ह मनू सीगु बीबीसीं जानकारी ब्यूगु दु ।

क्योडो न्यूज ऐजेन्सीया कथं, धाकुफसं यानाः ९० म्हसिबें अप्वः मनूत घाःपाः जूगु दु । इमिगु थीथी अस्पतालय् वासः जुयाच्वंगु जानकारी ब्यूगु दु । ११ म्ह बेपत्ता जूगु सरकारी अधिकारीपिन्सं धाःगु दु ।

इगु प्रायद्वीपं न्ह्याःगु धाकुफय् आः पूर्वी तटय् च्वंगु जापानया मू टापुपाखें पिहाँ वंगु दु । बीबीसीया कथं धाकुफय् २२५ किलोमिटर प्रतिघण्टां वयाच्वंगु दु ।

धाकुफसं जापानया आपालं क्षेत्रया जनजीवनय् लिच्वः लाःगु दु । एनएचकेया कथं, निगू लख ७० हजार छेँया विद्युत सेवा अवरुद्ध जूगु दु । हवाई व सतक आवागमन नं धाकुफसं लिच्वः लाःगु दु ।

तच्वकं ग्यानापूगु धाकुफसं थप मानवीय व भौतिक क्षति याइगु आकंलन यासें जापान सरकारं ७० लख मनूतय्त सुरक्षित थासय् वनेत उर्दी जारी याःगु दु ।

बुखँय् धाः कथं, धाकुफय् लिच्वः लाःगु क्षेत्रया ५० हजार मनूतसें छेँ त्वःताः सुरक्षित थासय् आः आश्रय कयाच्वंगु दु ।

सहर व गामय् धाकुफय् लिसें आपालं वा वयाच्वंगु व उगु क्रम छुं ई निरन्तर जुयातुं च्वनीगु सरकारी अधिकारीपिन्सं धाःगु दु । जेएमएया यासुसी कजिवारां सम्भावित क्षति जुइके मबिइत आपतकालीन ख्याच्वः ब्यूगु धाःगु दु ।

Categorized in अन्तर्राष्ट्रिय