nepal life 2076 3 18

छु जुयाः आकाझाकां अवरुद्ध जुल फेसबुक, इन्स्टाग्राम व ह्वाट्सएप ?

नेवा: अनलाइन न्युज | २०७६ आषाढ १९, बिहिबार १६:०७:३७

सोसल मिडिया साइटत फेसबुक, इन्स्टाग्राम व ह्वाट्सएप बधवाः हलिंन्यंकं हे छक्वलं अवरुद्ध जुल ।

हलिंया थीथी देसय् छ्यलाबुला याइपिन्सं थ्व सोसल मिडिया एपत बांलाक्क चलेमजूगु गुनासो यात । अय्सां, उगु एपत पूर्णरुपं बन्द मजूसे गुलिखे फिचरय् समस्या खनेदूगु खः ।

खासयानाः किपाः व भिडिायो लोड मजुइगु समस्या खनेदूगु खः । उगु समस्या फेसबुकया एप व वेबसाइट निगुलिं भर्सनया न्यूजफिडया लिसें इन्स्टाग्रामय् नं खनेदूगु खः ।

ह्वाट्सएपय् तकं छ्यलाबुला याइपिन्सं किपा व भिडियोतत छ्वयेत व उकियात डाउनलोड यायेत समस्या जूगु खः ।

फेसबुकया मू एपय् जक मजूसे मेसेन्जरय् तकं समस्या खनेदूगु खः ।

छ्यलाबुला याइपिन्सं समस्याया गुनासो यायेधुंकाः फेसबुकं ट्वीट यानाः उगु समस्याया पहिचान जूगु व समाधानया नितिं ज्या यानाच्वनागु धाःगु खः ।

वेबसाइट व एपतय्के वइगु समस्यायात कयाः निगरानी याइगु वेबसाइट डाउन डिटेक्टरं फेसबुक व इन्स्टाग्रामय् छुं किपाः पायछि कथं लोड मजगु व छुं खाली खनेदूगु धाःगु दु ।

लिपांगु दच्छि थुखे फेसबुक व ह्वाट्सएप व इन्स्टाग्रामय् तःक्वःमछि थुज्वःगु समस्या खनेदयाः वयाच्वंगु दु ।

अय्सां एप व वेबसाइटय् प्राविधिक हुनिं समस्या वइगु सामान्य खः । खासयानाः तःधंगु ल्याखय् छ्यलाबुला याइपिन्सं छक्वलं एप व वेबसाइट चलेयाइबलय् नं थुज्वःगु समस्या वइगु जुयाच्वंगु दु ।

–एजेन्सीया ग्वाहालि

Categorized in अन्तर्राष्ट्रिय