nepal lifef 2076 8 8

छय्–छुइ स्वये चाहे जूसा ‘ला’ नयादिसँ !

२०७३ फाल्गुण ६, शुक्रबार १३:२०:१९

थ्व तथ्य मनूतय्के नं लागू जुइगु निष्कर्ष वैज्ञानिकपिन्सं लुइकूगु दु ।

शाकाहारीपिनिगु नितिं दुःखया खबर खः । यदि छि छय्–छुइ स्वये चाहे जूसा ‘ला’ नयेमालीगु जुइ । आः नकतिनि जूगु छगू न्हूगु अनुसन्धान कथं शाकाहारी मिजंपाखें जन्म जूपिं मचातय्गु प्रजनन क्षमता कमजोर जूगु खनेदूगु दु । मिजं नं नइगु नसात्वसां वया मचातय्गु प्रजनन क्षमताय् गम्भीर लिच्वः लाकीगु तथ्य लुइकूगु दु ।

‘भुजिं’यात याःगु अध्ययनं प्रोटिन नयेमखंम्ह भुजिं नं जन्म ब्यूम्ह मचातय्गु प्रजनन क्षमता कमजोर जूगु व उज्वःपिं भुजिंपाखें न्हूम्ह भुजिं जन्म जुइत थाकुइगु क्यनातःगु दु ।

खासयानाः ‘ला’य् आपालं दइगु अत्यावश्यक पोषक तत्वया कमी जुयाः उकिं उज्वःपिं मिजंपाखें जन्म जुइम्ह मचाया प्रजनन क्षमता कमजोर यानाबिइ । अझ शाकाहारी मिजंपाखें जन्म जूपिं मिजं मचातय्के थुकिया लिच्वः अप्वः खनेदूगु व इमिगु शुक्रकिट अतिकं सुस्त जुइगु व प्रजनन यायेत थाकुइगु लिच्वः शोधकर्तापिन्सं पिकाःगु दु ।

अष्ट्रेलियाया मेलबर्नय् च्वंगु मोनास विश्वविद्यालयया शोधकर्तापिन्सं भुजिंयाके प्रोटिनया लिच्वःया अध्ययन याःगु खः । फ्रुट फ्लाई नांया भुजिंयात निगू पुचलय् ब्वथलाः छगू पुचःयात उच्च प्रोटिनयुक्त नसाज्वलं नकलसा मेगु पुचःयात प्रोटिन म्हो जक नकल ।

व लिपा उपिं भुजिंतसें याइगु प्रजननया विश्लेषण यात । उच्च मात्राय् प्रोटिन नकूपिं भुजिंतसें आपाः सन्तान उत्पादन यात गुकिया प्रजनन क्षमता नं सशक्त खनेदत ।

शोधकर्तापिन्सं प्रोटिन म्हो नकूम्ह मिजं भुजिंपाखें जन्म जूम्ह मिजं भुजिंतय्गु शुक्रकिट अतिकं कमजोर खनेदत । गुकिं प्रोटिन उच्च मात्राय् नःपिं भुजिंया सन्तानया शुक्रकिटलिसे प्रतिस्पर्धा यायेमफुत । सुं नं मिसा भुजिं नं चीहाकःगु इलय् हे आपालं मिजं भुजिंलिसे सहवास याःगु जुइ व उगु झ्वलय् गुम्ह मिजं भुजिंया शुक्रकिट बल्लाः जुइ, उकिं हे डिम्बलिसे मिलान जुयाः प्रजनन याकी ।

थ्व तथ्य मनूतय्के नं लागू जुइगु निष्कर्ष वैज्ञानिकपिन्सं लुइकूगु दु । अय्सां थुकिया मनूतय्के जुइगु लिच्वःया विषयस अध्ययन याये ल्यं हे दनि । भुजिंयात याःगु उगु अध्ययन बायोलोजी लेटर्स नांया जर्नलय् प्रकाशित जूगु खः ।